Milli Azərbaycan Tarixi Muzeyi və Yeni Azərbaycan Partiyasının “Z.Tağıyev küçəsi, 4” Ərazi Partiyası Təşkilatının təşəbbüsü ilə 1990-cı il qanlı 20 Yanvar faciəsinə həsr olunmuş “Müstəqilliyə gedən yolda xalqımızın qəhrəmanlıq salnaməsi” adlı tədbir keçirilib. Azərbaycan Respublikasının Dövlət Himni səsləndirildikdən sonra iştirakçılar Azərbaycanın müstəqilliyi və ərazi bütövlüyü uğrunda şəhid olanların xatirəsini bir dəqiqəlik sükutla yad ediblər. Tədbiri giriş sözü ilə Yeni Azərbaycan Partiyasının Milli Azərbaycan Tarixi Muzeyinin ilk ərazi təşkilatının sədri, aparıcı elmi işçi, t.ü.f.d dosent Bəhmən Kərimov açıb və 20 yanvar faciəsinin tarixi haqqında məlumat verib. Tədqiqatçı alim B.Kərimov qeyd etdi ki, həmin ağır və faciəli günlərdə Azərbaycan xalqına qarşı soyqırımı aktının həyata keçirildiyini ilk olaraq bütün dünyaya bəyan edən Ümummilli Lider Heydər Əliyev oldu. Sonra 20 Yanvar Azərbaycan Respublikası Ali İstintaq komissiyasının keçmiş üzvü, İqtisadiyyat üzrə fəlsəfə doktoru, müstəqil tədqiqatçı Lütfiyar Nəsibov, 20 Yanvar şahidləri- Mübariz İsmayılov, Sahib Əlizadə, Şahin İmaməliyev, “Z.Tağıyev küçəsi, 4” Ərazi Partiyası Təşkilatının nümayəndələri- Vətən müharibəsi fondunun müdiri Şəfa Mövsümov, həmin şöbənin əməkdaşları, təşkilatın sədr müavini Pərvanə Əzimova və Gülnar Fərhadova 20 Yanvar faicəsi haqqında ətraflı məlumat veriblər. Sonda xatirə fotosu çəkilib.