Milli Azərbaycan Tarixi Muzeyində ilk dəfə məktəbəqədər yaşlı uşaqlara milli-mənəvi dəyərlərin öyrədilməsi məqsədilə “Milli Guşənin Təşkili və Uşaqlara Aşılanması” adlı interaktiv tədbir keçirilib. Tədbirdə Bakı şəhəri üzrə 15 məktəbəqədər təhsil müəssisələrinin təlimçi və tərbiyəçi müəllimləri, eləcə də Milli Azərbaycan Tarixi Muzeyinin əməkdaşları iştirak ediblər.

Tədbir çərçivəsində Muzeyin İnnovasiyalar və təhsil proqramları şöbəsinin müdiri Fəridə Şəmsi “Milli Azərbaycan Tarixi Muzeyində tədris-əyləncə proqramlarının yeni formaları” adlı məruzə ilə çıxış edib. Həmin şöbənin baş mütəxəssisi Qənirə Qafarlı isə “Novruz ənənələri: mərasimlər, personajlar və simvollar muzeydə interaktiv və əyləncəli proqram vasitəsi kimi” mövzusunda, təqdimatın müşayiəti ilə çıxış edib.

Daha sonra “Öyrədək və Öyrənək” şüarı altında tədbirin praktik hissəsinə keçid edilib. Tərbiyəçi müəllimlər 5 qrup üzrə praktiki fəaliyyət göstərərək, uşaqlara erkən yaşlardan nağıllar, musiqilər və oyunlar vasitəsilə adət-ənənələrimizi və milli-mənəvi dəyərləri aşılamaq mövzusunda qrup işləri təqdim ediblər. Tədbir zamanı iştirakçılara: “Kasa-kasa” oyununun oynanılma qaydası, canlı nağıl yaratma prosesi, daşlarla oynanılan qədim oyunlar, xalça toxuma sənəti və onun alətlərindən düzgün istifadə qaydaları haqqında ətraflı məlumat verilib.

Sonra “Azərxalça” ASC tərəfindən hazırlanmış xüsusi videorolik təqdim olunub.

Tədbirin yekununda uşaqlar üçün “Tərəkəmə” və “Nəlbəki” rəqslərinin ifası nümayiş etdirilib.

Tədbirin sonunda bütün iştirakçılar təlimçi müəllim Vəsilə Bayramova tərəfindən sertifikatlarla mükafatlandırılıblar. Bu kimi interaktiv tədbirlərin muzeydə keçirilməsi milli-mənəvi dəyərlərin aşılanması və mədəni irsin gələcək nəsillərə ötürülməsi baxımından böyük əhəmiyyət kəsb edir.