Milli Azərbaycan Tarxi Muzeyinin 105 illiyinə həsr olunmuş ikigünlük «Tarixin öyrənilməsinin və tədrisinin aktual problemləri» mövzusunda respublika elmi konfransı dekabrın 3-də öz işini başa çatdırıb. Konfransın ikinci günü ölkənin müxtəlif elmi müəssisələrini və ali məktəblərini təmsil edən 17 alimin Azərbaycan tarixinin müxtəlif dövrlərinin araşdırılması və tədris prosesində əks olunması məsələlərinə dair məruzələri dinlənilmiş, geniş fikir mübadiləsi aparılmışdır. Elmi forumun iştirakçıları Vətən tarixinin dövrləşdirilməsi, Azərbaycan xalqının etnogenezi problemlərinin həlli istiqamətində ölkə alimlərinin səylərinin birləşdirilməsinin vacibliyini qeyd etdilər. Həmçinin müasir tarixi tədqiqatların həm dərsliklərin yazılmasında, həm də tədris prosesində daha geniş əks olunmasının zəruriliyi vurğulandı.

Qeyd edək ki, konfrans materiallarının bu ilin sonunadək nəşr olunması nəzərdə tutulub.