18 may-Beynəlxalq Muzeylər Günü münasibətilə “Muzeylər və təhsil inteqrasiyasında mədəni irs” adlı elmi seminar keçirilib. Milli Azərbaycan Tarixi Muzeyi və Mingəçevir Dövlət Universitetinin Pedaqoji fakültəsinin birgə təşkilatçılığı ilə keçirilən seminarda universitetin müəllimləri, tələbələri və muzey əməkdaşları iştirak ediblər. Seminarı giriş sözü ilə muzeyin direktor müavini, tarix elmləri doktoru, dosent Fərhad Cabbarov açaraq, mədəni irsin öyrənilməsində muzeylərin rolundan danışıb.

Daha sonra Mingəçevir Dövlət Universitetinin Pedaqoji fakültəsinin dekan müavini, dosent Aygün Qədirova çıxış edərək, muzey və universitet əməkdaşlığının tələbələrin elmi dünyagörüşünün formalaşmasında mühüm əhəmiyyət daşıdığını vurğulayıb. Seminarda Muzeyin böyük elmi işçisi, t.ü.f.d. Laçın Mustafayev “Arxeoloji irs; tarixin tədqiqi muzey kontekstində”, Humanitar fənlər kafedrasının baş müəllimi, t.ü.f.d. Vüsalə Mövlayeva “Muzey pedaqogikası: interaktiv təlim üçün yeni imkanlar”, Milli Azərbaycan Tarixi Muzeyinin böyük elmi işçisi, t.ü.f.d. Aidə İsmayılova “Arxeoloji artefaktın muzey mühitində semantik rekonstruksiyası: maddi mədəniyyət nümunələrinin mənbəşünaslıq şərhi (interpretasiyası)”, Humanitar fənlər kafedrasının baş müəllimi, fil.ü.f.d. Səadət Ağakişiyeva “Muzeylərdə ədəbi irsin qorunması və milli yaddaşın formalaşdırılmasında rolu” və Tarixin tədrisi metodikası ixtisasının magistrantı İlahə İbrahimova “Universitet-muzey əməkdaşlığı: onlayn ekskursiyalar və muzey mütəxəssislərinin ustad dərslərinin tələbələrin mədəni dünyagörüşünün formalaşmasına təsiri” mövzusunda çıxış ediblər. Məruzələr slayd təqdimatları ilə müşayiət olunub.

Tədbir iştirakçılar tərəfindən maraqla qarşılanıb, verilən suallar ətraflı şəkildə cavablandırılıb. Sonda qonaqlar muzeyin ekspozisiyası ilə tanış olublar.