Milli Azərbaycan Tarixi Muzeyinin direktoru, akademik Nailə Vəlixanlının “VII–XII əsrlərdə Naxçıvanın tarixindən” adlı yeni nəşr edilmiş monoqrafiyasında Azərbaycanın qədim şəhərlərindən biri olan Naxçıvanın altı əsrlik tarixi əhatəli şəkildə tədqiq olunub. Əsərdə müxtəlifdilli mənbələrin müqayisəli analizi və müasir elmi araşdırmaların nəticələri əsasında Naxçıvan şəhərinin siyasi, ictimai və mədəni inkişaf mərhələləri elmi əsaslarla təqdim edilib. Akademik N.Vəlixanlı, həmçinin tədqiqat predmeti üzrə tarixşünaslıq materiallarını ümumiləşdirməklə yanaşı, erməni tarixşünaslığının Ərəb Xilafəti dövrü ilə bağlı region tarixinə dair saxtalaşdırma cəhdlərini xüsusilə vurğulayaraq, bu tendensiyanı tarix elminin obyektivliyinə qarşı yönəlmiş metodoloji problem kimi qiymətləndirib. Monoqrafiya tarix elmi, Yaxın Şərq araşdırmaları, regionşünaslıq və mənbəşünaslıq sahəsində çalışan mütəxəssislər üçün əhəmiyyətli elmi mənbə hesab olunur.

Qeyd edək ki, sözügedən kitab müəllif tərəfindən akademik Ziya Bünyadovun xatirəsinə həsr olunub.