Seminar Qobustan Milli Tarix-Bədii Qoruğunun direktoru Vüqar İsayevin və AMEA Gənc Alim və Mütəxəssislər Şurasının sədri k.ü.f.d Elmir Babayevin açılış nitqi ilə başladı.

Daha sonra Milli Azərbaycan Tarixi Muzeyinin Gənc Alim və Mütəxəssislər Şurasının sədri Aslan Qasımov - "Beynəlxalq abidələr günü", Qobustan Milli Tarix-Bədii Qoruğunun Qoruğun İnkişafı və İnnovasiya şöbəsinin müdiri Şəbnəm Yusifova - "Qobustan abidələri UNESCO-nun Dünya Mədəni İrs siyahısında", AMEA Milli Azərbaycan Tarixi Muzeyinin İnnovasiyalar və təhsil proqramları şöbəsinin mütəxəssisi Qənirə Qafarlı - "Tağıyev sarayı memarlıq abidəsi kimi", Qobustan Milli Tarix-Bədii Qoruğunun aparıcı elmi işçisi Sevinc Şirinli - "Qobustan qayaüstü təsvirlərinin xronologiyasının dəqiq dövrləşdirmə metodları ilə müəyyən edilməsi layihəsi haqqında", AMEA Radiasiya problemləri İnstitutunun əməkdaşı Aybəniz Əhədova - "Dəqiq dövrləşdirmə metodları və onların Qobustanın tədqiqində tətbiqi" adlı məruzələrlə çıxış etdilər və verilən suallar ətraflı cavablandırıldı.

Seminar iştirakçıları ilə Qobustan abidələrinin öyrənilməsi məqsədilə gələcəkdə Azərbaycan Milli Elmlər Akademiyasının gənclərinin tədqiqatlarından səmərəli istifadə haqqında da müzakirələr aparıldı.

Qeyd etmək lazımdır ki, seminarda AMEA ilə yanaşı bir sıra təhsil ocaqlarının bakalavr və magistr tələbələri də iştirak etmişdir.

Sonda Qobustan Milli Tarix-Bədii Qoruğuna ekskursiya təşkil olundu.