Azərbaycanda ənənəvi məişət mədəniyyətini əks etdirən interyer nümunələrini nəzərdən keçirdikdə, toxuculuq sənəti ilə yanaşı, tikmə sənətinin də yüksək inkişaf səviyyəsinə çatdığını görmək mümkündür. Tarix boyu xalqımız güləbətin, təkəlduz, pilək, muncuq və bir sıra tikmə növləri ilə zəngin sənət ənənəsi formalaşdırıb. Bu tikmələr arasında qədim tarixə malik olan pilək sənəti xüsusilə seçilir.  Zəngin irsin nadir nümunələrindən biri də muzeyin Etnoqrafiya fondunda qorunan, XX əsrə aid sarı atlaz parçadan hazırlanmış və zərif tikmə elementləri ilə bəzədilmiş pərdədir. Parçanın tən yarısı ipək və güləbətin saplarla doldurma üsulu ilə işlənib. Pərdənin mərkəzi hissəsində nəbati naxışlar fonunda gümüşü-mavi çalarlarda təsvir olunmuş tovuz quşu fiquru yerləşir. Bu təsvir “güzgülü pilək”lər vasitəsilə bəzədilərək eksponata daha zəngin estetik dəyər qazandırıb. Sözügedən eksponatda Çin sənətkarlığına məxsus naxış kompozisiyasından istifadə olunub, kənarları isə müxtəlif fiqurlar və “bulud” elementləri ilə əhatələnib.

Qeyd edək ki, təqdim olunan pərdə Bakı milyonçusu, xeyriyyəçi Hacı Zeynalabdin Tağıyevin oğlu Sadıq Tağıyev və  ictimai xadim, drammaturq, Mirzə Fətəli Axundovun nəvəsi Mələksima Axundovanın ailəsinə məxsus olub.