Azərbaycanın qədim sənət sahələrindən biri dulusçuluqdur. Bu sahədə görülən işlər, xüsusilə saxsı qabların istehsalı bu günə qədər əhəmiyyətini qoruyub saxlayır. Azərbaycan məişətində gildən hazırlanan qablar sırasında küpə xüsusi yer tutur. Küpələrin istifadə formaları yalnız qida və su saxlamaqla məhdudlaşmır, həm də xalq yaddaşında bərəkət, təmizlik, ruzi, ailə rifahı kimi anlayışlarla əlaqələndirilirdi. Küpə Azərbaycanın etnoqrafik irsində mühüm yer tutur və bu günədək mədəni identikliyin komponentlərindən biri kimi tanınır.

XVIII əsrə aid təqdim olunan küpə boz rəngli gildən hazırlanıb, qabın daxili və xarici səthi yaşıl şirə ilə örtülüb. Küpə nisbətən qabarıq gövdəyə, hündür boğaza və kənarı xaricə doğru qatlanmış enli ağıza malikdir. Qabın gövdədən boğaza birləşən 5 kiçik halqavari qulpları mövcuddur. Boğaz hissədə üfüqi istiqamətdə sünbül naxışı, gövdəsində isə şaquli istiqamətdə 3 nazik zolağı var və bu zolaqlar arasında kiçik xətlərlə naxışlar həkk edilib.