Azərbaycan Milli Elmlər Akademiyasında Azərbaycan-Çin əlaqələrinə həsr olunan “dəyirmi masa” keçirilib. AMEA-nın prezidenti, akademik Akif Əlizadə Çin İctimai Elmlər Akademiyasının prezidenti, akademik Van Veyquanın rəhbərlik etdiyi nümayəndə heyətini qəbul edib. Görüşdə AMEA-nın vitse-prezidentləri, akademiklər, AMEA-nın institut və müəssisə rəhbərləri iştirak ediblər. Milli Azərbaycan Tarixi Muzeyinin direktoru, akademik Nailə Vəlixanlı, Muzeyin Xarici əlaqələr və elmi-kütləvi iş şöbəsinin müdiri Emin Dadaşov da tədbirdə iştirak ediblər. Qonaqlara Akademiyanın yaranma tarixi və əsas fəaliyyət istiqamətləri barədə məlumat verən AMEA-nın prezidenti bildirib ki, 2015-ci ildə bu elm ocağının 70 illik yubileyi təntənəli şəkildə qeyd olunmuşdur. Alim vurğulayıb ki, bu gün yeni bir inkişaf mərhələsinə qədəm qoyan AMEA-da prioritet elmi istiqamətlərdə araşdırmalar aparılır, dünyanın nüfuzlu elmi mərkəzləri və ali məktəbləri ilə əməkdaşlıq əlaqələri qurulur. Görüşdə Çin-Azərbaycan əlaqələrinin tarixindən söz açılıb, ölkələr arasında iqtisadi, siyasi, elmi və mədəni sahələri əhatə edən qarşılıqlı əməkdaşlığın bu gün də dinamik inkişaf etdiyi vurğulanıb. Hər iki ölkənin elmi mərkəzləri arasındakı mövcud münasibətlər və gələcək inkişaf prioritetləri müzakirə olunub. Sonda akademik Akif Əlizadə qonaqlara xatirə hədiyyələri təqdim edib.