Tədbirdə AMEA Milli Azərbaycan Tarixi Muzeyinin Beynəlxalq əlaqələr şöbəsinin müdiri Emin Dadaşov “Müasir muzeylərdə yüksək texnologiyaların tətbiqi (Milli Azərbaycan Tarixi Muzeyinin nümunəsində)” mövzusunda çıxış edərək 2020-ci ildə 100 illik yubileyini qeyd edən ölkənin əsas muzeyi – Milli Azərbaycan Tarixi Muzeyində rəqəmsal texnologiyaların praktik tətbiqi haqqında geniş məlumat vermişdir. Bildirib ki, Muzeyin yeni ekspozisiyasında interaktiv və sensor masaların tətbiqi zamanı Muzey ilə ziyarətçinin qarşılıqlı münasibətinə xüsusi diqqət ayrılmışdır. Belə ki, yenilənmiş ekspozisiyanda ziyarətçi sərbəst şəkildə seçdiyi rəqəmsal kontenti oxuya, izləyə və ya dinləyə bilər. Nəticədə yüksək texnologiyalar Muzeyi həm maarifləndirici mərkəzə, həm də ziyarətçinin vaxtını səmərəli və əyləncəli keçirə biləcəyi məkana çevirmiş olur. E.Dadaşov Muzeydə yeni texnologiyaların tətbiqindən məlumat verərək 2020-ci il iyunun 17-də təmir və yenidənqurma işlərindən sonra açılışı keçirilmiş Milli Azərbaycan Tarixi Muzeyinin nəzdində fəaliyyət göstərən Hacı Zeynalabdin Tağıyevin xatirə muzeyindən də danışmışdır. Xatirə muzeyinin yeni ekspozisiyasında iriölçülü ekranda (touch screen) H.Z.Tağıyevin sahibkarlıq və ictimai fəaliyyəti, Azərbaycanda və onun hüdudlarından kənarda gördüyü xeyriyyə işləri, ailəsi haqqında məlumatlar yerləşdirilib. Həmin məlumatlar üç dildə – Azərbaycan, ingilis və rus dillərində təqdim olunur. İnteraktiv masanın üstünlüklərindən biri də eyni zamanda dörd ziyarətçinin orada qeyd olunan məlumatlarla tanış ola bilməsidir. Ekspozisiya ilə yanaşı rəqəmsal yeniliklərdən Muzeyin fondlarında mühafizə olunan exponatların elektron pasportlaşdırması zamanı da istifadə olunur. Belə ki, 2020-ci ildə Fondların elektron pasportlaşdırma proqramının təminatı da yenilənmişdir. “Metaphora” (Metafora) şirkəti tərəfindən hazırlanmış yeni “Collsys” (Kolsis) proqram təminatı hər fondun tələbinə uyğun tərtib olunmuş, Muzeyin eksponatları haqqında ətraflı məlumat ilə yanaşı yüksək keyfiyyətli fotoşəkillərin yüklənməsi funksiyaları da yenilənmişdir. Gələcəkdə proqramda Muzeyin incilərinin 3D ölçülü təsvirlərinin də əlavə edilməsi nəzərdə tutulmuşdur. Sonda tədbir iştirakçılarının sualları cavablandırılmışdır.