Milli Azərbaycan Tarixi Muzeyi daim tələbə və gənclərin maraq dairəsindədir. YAP Səbail rayon təşkilatının təşəbbüsü ilə rayon gəncləri Muzeyi ziyarət ediblər. Səbail rayon idarə və təşkilatlarının əməkdaşlarına, tələbələrə, partiyanın fəal gənclərinə Muzeyin zallarında ekskursiya aparıldı. Muzeyin YAP “Azərbaycan tarixçilərinin” ilk ərazi təşkilatının sədri, muzeyin əməkdaşı Pərvanə Əzimova qonaqlara muzeydə toplanmış və nümayiş olunan Azərbaycan tarixinə aid eksponatlar haqqında məlumat verdi. Ölkəmizin maddi-mənəvi irsinin qoruyucusu olan Muzeydə bu səpkili ekskursiyaların təşkili gənclərimiz tərəfindən tariximizin daha da dərindən öyrənilməsi, vətənpərvərlik hisslərinin gücləndirilməsi, xüsusilə də dövlət müstəqilliyinin müqəddəsliyinin şüurlu şəkildə dərk edilməsi istiqamətində mühüm əhəmiyyət kəsb edir. Bu maarifləndirici ekskursiyada böyük maraqla iştirak edən qonaqlar ziyarətdən yüksək təəssüratlarla ayrıldılar.