28 sentyabr tarixində Mədəniyyət və Turizm Nazirliyinin təşkil etdiyi V Bakı Beynəlxalq Kitab Sərgisinin açılışı oldu. Bakı İdman Sarayında keçirilən sərginin təşkilinin əsas məqsədi ölkədə kitab və oxuma maraqlarının artırılması, Azərbaycanın kitab mədəniyyətini ölkəmizdə təqdim və təbliğ etməkdir. Milli Azərbaycan Tarixi Muzeyi də bu sərgidə öz nəfis tərtibatlı nəşrləri (kataloq, buklet, broşür və elmi məqalələr toplusu) ilə iştirak edir. Muzeyin sərgidə nümayiş etdirdiyi maraqlı nəşrlər xarici və yerli kitabsevərlərin diqqətini çəkmişdir. Sərgini ziyarət edənlər arasında kitabxana işçiləri, kolleksionerlər və Azərbaycan Respublikası Milli Məclisinin deputatları muzeyin nəşrləri ilə xüsusi tanış olublar. Böyük Britaniya və Şimali İrlandiya Birləşmiş Krallığı, ABŞ, Rusiya Federasiyası və b. ölkələrin kitabsevər kolleksionerləri Azərbaycan tarixinin, mədəniyyətinin maddi-mənəvi incilərindən ibarət muzeyin kataloqları və digər nəşrləri ilə maraqlanıb, bir neçəsini məmnunluqla əldə ediblər. Qeyd edək ki, muzeyin satışa qoyulan nəşrləri xüsusi endirimlə satılır. Kitabsevərlərin, Azərbaycan tarixi ilə maraqlanan oxucuların nəzərinə çatdırırıq ki, kitab sərgisi 2017-ci il 30 sentyabradək davam edəcək. Bütün muzeysevərləri və gənc tədqiqatçı tarixçiləri sərgiyə dəvət edirik.