Milli Azərbaycan Tarixi Muzeyi mədəni-tarixi irsimizin tədqiqini, təbliğini və mühafizəsini həyata keçirən elmi-tədqiqat müəssisəsi olaraq əvvəlki illərdə olduğu kimi, bu son zamanlarda da fondlarını zənginləşdirmək məqsədilə maddi mədəniyyət nümunələrinin qəbulunu davam etdirmişdir. Qəbul edilmiş maddi mədəniyyət nümunələri arasında 104 ədəd arxeoloji, 1 ədəd təsadüfi tapıntı da var. Bunlar 2017-ci ildə AMEA Arxeologiya və Etnoqrafiya İnstitutunun ilk orta əsrlər arxeologiyası şöbəsinin əməkdaşları, t.ü.e.d. Qafar Cəbiyevin rəhbərliyi altında və t.ü.f.d. Elmira Abbasovanın iştirakı ilə Şamaxı rayonu, Dəmirçi kəndi yaxınlığındakı nekropolda aparılmış arxeoloji qazıntının tapıntılarıdır. Təhvil verilmiş tapıntıların hamısı qəbir avadanlığıdır. Tapıntılar məişət avadanlığından - mətbəx və süfrə qablarından, metal bəzək nümunələrindən, müxtəlif tərkibli muncuq düzümlərindən, eləcə də hərb işində istifadə olunmuş dəmir qılınc və xəncər tiyələrindən ibarətdir. Saxlanma vəziyyətlərinə görə tapıntıların bir qismi bütöv və əla, digər qismi isə sınıq, natamam və kafi vəziyyətdədir. Arxeologiya fondunun müdiri, t.ü.f.d. Nasir Quluzadənin sözlərinə görə bu tapıntıların bəzi oxşar nümunələri Arxeologiya fondunda qorunur. Tapıntıların dövrünə gəldikdə isə, yeni qəbul edilmiş bu tapıntılar antik dövrə aid olması ehtimal edilmişdir. Yeni arxeoloji tapıntılar Şirvan bölgəsinin maddi mədəniyyətinə aid olub, təmsil etdikləri dövrdə dulusçuluq, bədii metalişləmə sənətinin inkişaf səviyyəsi, eləcə də hərb sənəti haqqında dolğun təssəvvür yaradır. Bununla belə bu tapıntılar Qafqaz Albaniyası əhalisinin dəfn adətlərini, məişətini, əlaqələrini və bədii zövqünü özündə əks etdirən məxəz kimi də çox dəyərlidirlər.