Cari ilin 16-17 oktyabr tarixlərində AMEA-nın Əsas binasında bu qurumun Rəyasət Heyəti, akademik Z.M.Bünyadov adına Şərqşünaslıq İnstitutu və Milli Azərbaycan Tarixi Muzeyinin birgə təşkilatçılığı ilə “Müasir şərqşünaslığın aktual problemləri” (Ziya Bünyadov qiraətləri) mövzusunda beynəlxalq konfrans keçirilmişdir. Konfrans üç - “Qədim və orta əsrlər Şərq tarixinin tarixşünaslığı və mənbəşünaslığı”, “Müasir Şərq ölkələrində ictimai və siyasi proseslər” və “Şərq xalqlarının ictimai, fəlsəfi və dini fikir məsələləri” bölməsi üzrə işini Milli Azərbaycan Tarixi Muzeyində davam etdirib. Tədbiri Muzeyin direktoru, akademik Nailə Vəlixanlı giriş sözü ilə açaraq qonaqları salamlayıb. N.Vəlixanlı görkəmli şərqşünas Z.Bünyadovun həyat və yaradıcılığından bəhs edərək onunla bağlı xatirələrini bölüşüb. Ziya Bünyadov həm də Şərq dillərinin bilicisi kimi gözəl tərcüməçi idi. Onun əsərləri Fransada, İraqda, Rusiyada, Türkiyədə və dünyanın bir sıra başqa ölkələrində nəşr olunmuşdur. O, dünyanın bir sıra alimlərinin əsərlərini ingilis, ərəb, rus və türk dillərindən tərcümə etmişdir. Görkəmli alim həyatının son illərində Tacəddin əs-Salmaninin “Tarixnamə”, V.V.Bartoldun “Xəzəryanı vilayətlərin müsəlman aləmində yeri” əsərlərini tərcümə edib. Xüsusilə qeyd etməliyik ki, akademik Z.Bünyadovun ən yaddaqalan töhfələrindən biri də professor Vasim Məmmədəliyevlə birgə “Qurani-Kərim”i Azərbaycan dilinə tərcümə etməsidir. Konfransda bölmələr üzrə Türkiyə Cümhuriyyəti, Rusiya Federasiyası, Rusiyanın Dağıstan Respublikası və Özbəkistan Respublikasının şərqşünas və tarixçi alimləri mühazirələrini təqdim etmiş və dinləyicilərin suallarını cavablandırmışlar. Əhəmiyyətli müzakirələr şəklində keçən konfransın iştirakçıları sonda Milli Azərbaycan Tarixi Muzeyinin ekspozisiyası ilə də tanış oldular.