Azərbaycan Respublikasının Prezidenti cənab İlham Əliyevin 2016-cı ili “Multikulturalizm ili”, 2017-ci ili “İslam Həmrəyliyi İli” elan etməsilə əlaqədar Milli Azərbaycan Tarixi Muzeyində Bilik Fondunun dəstəyilə növbəti seminar baş tutdu. 27 oktyabr 2017-ci il tarixində saat 11.00-da təşkil edilən seminar “Azərbaycanın multikultural mədəniyyət tarixindən” mövzusunda keçirildi. Tədbirdə Alban-Udi xristian dini icmasının sədri Robert Mobili, Roma Katolik Kilsəsinin nümayəndəsi Cozef Marik, Azərbaycan Dillər Universitetinin (ADU) Multikulturalizm ETL-nin əməkdaşları, Muzey əməkdaşları, ADU tələbələri və H.Mahmudbəyov adına 2 saylı Texniki-Humanitar Elmlər Liseyinin şagirdləri iştirak etdi. Tədbiri giriş sözü ilə Muzeyin elmi işçisi, t.ü.f.d. Əli Fərhadov açdı və qeyd etdi ki, cənab prezident İlham Əliyevin müvafiq sərəncamlarına uyğun olaraq multikulturalizm və İslam həmrəyliyi mövzusunda muzeydə mütəmadi tədbirlər keçirilir. Bu tədbirlər gənclərin maariflənməsi üçün böyük əhəmiyyətə malikdir. Daha sonra o, “Azərbaycanın multikultural modeli” mövzusunda məruzə etdi və tarix boyu ölkəmizdə yaşayan müxtəlif xalqların, fərqli din mənsublarının qardaşcasına birlikdə yaşadığını və bunun xalqımızın bir həyat tərzi olduğunu bildirdi. Daha sonra Alban-Udi xristian dini icmasının sədri Robert Mobiliyə söz verildi. R.Mobili “Azərbaycanda udi mədəniyyəti və Alban (Qafqaz) kilsəsinin bərpası tarixindən” mövzusunda çıxış etdi. O, Azərbaycanda xristianlığın qədim tarixə malik olduğunu və Alban-Udi xristian dini icmasının da dövlətimizin qayğısı ilə tam fəaliyyət göstərdiyini bildirdi. Sonra Roma Katolik Kilsəsinin nümayəndəsi Cozef Marik çıxış etdi və Azərbaycan Respublikasının multikultural siyasəti nəticəsində müxtəlif dini icmaların birlikdə mehriban yaşadığını, bunun dünya ölkələri üçün bir nümunə olduğunu göstərdi. Tədbirin sonunda iştirakçıların sualları natiqlər tərəfindən ətraflı cavablandırıldı. Bu kimi tədbirlərin gələcəkdə də davam etdiriləcəyi qeyd olundu.