“Gənc Vətənpərvərlər Birliyi” (GVB) Azərbaycan Respublikası Prezidenti yanında Gənclər Fondunun maliyyə dəstəyi ilə Səbail rayon 7 saylı tam orta məktəbdə 17 noyabr - Milli Dirçəliş Gününə həsr olunmuş elmi-praktik konfrans keçirib. Tədbir "Gənclər arasında vətənpərvərlik tərbiyəsinin təşviqi” adlı layihə çərçivəsində təşkil edilib. Konfrans “Milli dirçəlişdən qüdrətli dövlətçiliyə doğru” və “Məktəb vətənpərvərlik tərbiyəsinin təbliğində əsas mərkəzdir” mövzularında keçirilmişdir. Tədbirdə Milli Azərbaycan Tarixi Muzeyinin əməkdaşı P.Əzimova da iştirak edib. AMEA Milli Azərbaycan Tarixi Muzeyinin Xarici əlaqələr və elmi kütləvi iş şöbəsinin elmi işçisi P. Əzimova qeyd etdi ki, müasir dövrdə müxtəlif ideologiyaların gənclərin dünyagörüşünün, şəxsiyyətinin formalaşmasına təsiri fonunda milli düşüncəni qorumaq, gənclərin vətənpərvər ruhda böyüməsinə yardım etmək cəmiyyətin hər bir üzvünün vəzifəsidir. Bu istiqamətdə dövlət tərəfindən çoxsaylı tədbirlər həyata keçirilsə də, vətəndaş cəmiyyətinin öhdəsinə daha böyük işlər düşür. Bu baxımdan qeyd olunan layihədə əsas məqsəd gənclər arasında hərbi vətənpərvərliklə bağlı təbliğat işlərini aparmaqdır. Konfransda layihə rəhbəri M.Əliyev və məktəbin müəllimləri də çıxış etmişdirlər. Tədbirin sonunda iştirakçıların sualları natiqlər tərəfindən ətraflı cavablandırılmışdır.