Milli Azərbaycan Tarixi Muzeyinin 2020-ci ildə baş tutacaq 100 illik yubileyinin hazırlıq işlərinə başlanılıb. Hal-hazırda Muzeyin “Arxeoloji qızıl əşyaları” vitrinində reekspozisiya işləri görülür. Muzeyin Xüsusu fondunda qiymətli metalların xronologiyası, tarixi əhəmiyyəti araşdırılır və texniki işlər həyata keçirilir. Azərbaycan xalqının yaratdığı zəngin, çoxşaxəli və təkrarsız mədəni dəyərlərin mühüm bir hissəsi qiymətli metalların payına düşür. Sənətkarlıq Azərbaycanın iqtisadi həyatında mühüm rol oynamış, yerli əhalinin məişətinə və mədəniyyətinə daxil olmuşdur. Bunu istər yazılı mənbələrdə, istərsə də arxeoloji qazıntılar nəticələrində görmək olar. Xüsusi fondun müdiri, t.ü.f.d. Afət Rüstəmbəyovanın dediyinə görə, Muzeyin 100 illiyi ilə əlaqədar ekspozisiyanın zərgərlik məmulatı bölməsinin zənginləşdirilməsi nəzərdə tutulur. A.Rüstəmbəyova qeyd etdi ki, tamaşaçıların maraq dairəsini genişləndirmək üçün Muzeyə daxil olan yeni zinət əşyaları ilk dəfə nümayiş olunacaq. Bu baxımdan fondda olan materiallar arxeoloji tapıntı, dövrə görə yığılır və ekspozisiyada yerləşdiriləcək. Muzeyin bərpaçı-dizayneri Vüqar Xudaverdiyev tərəfindən fondda olan qızıl əşyaların bərpa olunub və podiumda yerləşdirilməsi işləri görülür. Ekspozisiyada nümayişi nəzərdə tutulan arxeoloji zinət əşyaları arasında e.ə. IV minllikdən başlamış, orta əsrlərə qədər dövrü əhatə edən sırğa, bilərzik qalıqları, üzük, sancaq və s. qiymətli metallar var. Onların ekspozisiyada nümayişi Muzeyin və tariximizin təbliği baxımından böyük əhəmiyyət daşıyır.