AMEA Mərkəzi Elmi Kitabxanası (MEK) fondlarında mühafizə olunan “Tarix Muzeyi kolleksiyası”nın təqdimatını keçirib. MEK-in Komplektləşdirmə bölməsinin əməkdaşları kolleksiyanı slayd və sərgi formatında təqdim ediblər. Bildirilib ki, 2015-ci ildə Mərkəzi Elmi Kitabxanaya AMEA Milli Azərbaycan Tarixi Muzeyi tərəfindən 4598 nüsxə kitab göndərilib. 2050 nüsxə kitab kitabxana qaydalarına uyğun olaraq işlənilib və elektron kataloqa daxil edilib. Fransız dilində 955, alman dilində 837, rus dilində 508, ingilis dilində 184, qədim erməni dilində 881, şərq dillərində 80, latın dilində 4, yunan dilində 1, italyan dilində 2, polyak dilində 2, Azərbaycan dilində 11 kitab sistemləşdirilib. Kolleksiyada Azərbaycan tarixinə, ədəbiyyatına aid olan kitablar MEK-in lahiyəsi olan Milli Rəqəmsal Yaddaş (MRY) bazasına daxil edilib. Ən qədimi 1600-cü ilə aid latın dilində olan kitabdır. Qottfrid Mertsbaxer tərəfindən qələmə alınmış əsərdə müəllifin Qafqazın yüksək regionları ilə bağlı səyahət, təcrübə və müşahidələri toplanmışdır. AMEA Milli Azərbaycan Tarixi Muzeyinin Kitabxana müdiri Faidə Abdullayeva çıxış edərək bildirdi ki, muzeyin kitabxanasında yeni texnologiyaların tətbiqi, istifadəsi nəticəsində müasir kitabxana-informasiya infrastrukturunun yaradılması və istifadəçilərə göstərilən kitabxana-informasiya xidmətinin dünya standartları səviyyəsinə çatdırılması nəzərdə tutulur. F.Abdullayeva həmçinin kitabxanada mövcud problemlərdən bəhs etdi. Sonra muzeyin Kitabxanasının əməkdaşı Fatma Qəniyeva muzeyin nadir kitablar fondunda qorunan əsərlərin biblioqrafik göstəricilərindən bəhs edib. O, gələcəkdə də bir sıra sənədlərin muzey tərəfindən Mərkəzi Elmi Kitabxanaya təqdim olunacağını söyləyib. Mərkəzi Elmi Kitabxananın direktoru Leyla İmanova akademik Nailə Vəlixanlı başda olmaqla Milli Azərbaycan Tarixi Muzeyinin bütün kollektivinə seçilmiş və hədiyyə edilmiş kitablara görə təşəkkür etdi və MEK tərəfindən kolleksiyanın davamının gözlənildiyini bildirdi. Sonda Milli Azərbaycan Tarixi Muzeyinin kitabxanaçısı Mina Əliyeva muzeyin nadir fondunda MEK-in oxucuları üçün maraq doğura biləcək xeyli sayda kitabların olduğunu və onların da MEK-ya təqdim edilməsi üçün hazırlandığını deyib.