Milli Azərbaycan Tarixi Muzeyində Azərbaycanın Milli Qəhrəmanı Rafiq Nəsrəddinova həsr olunmuş “Adın qürurumuzdur, Milli Qəhrəman” adlı tədbir keçirilib. Tədbir Milli Azərbaycan Tarixi Muzeyi və Nərimanov rayonu R.Nəsrəddinov adına 39 saylı tam orta məktəbin birgə təşkilatçılığı ilə Azərbaycanın Milli Qəhrəmanı Rafiq Nəsrəddinovun xatirəsinə həsr olunmuşdur. Anım tədbiri Azərbaycan Respublikasının Prezidenti İlham Əliyevin 15 sentyabr 2017-ci il tarixli Sərəncamı çərçivəsində “Azərbaycan gəncliyi 2017–2021-ci illərdə” “Dövlət Proqramı”na əsasən gənclərdə azərbaycançılıq, dövlətçilik prinsipləri əsasında vətəndaşlıq və vətənpərvərlik tərbiyəsinin gücləndirilməsi məqsədilə keçirilmişdir. Tədbirdə Azərbaycan Hərb Tarixi Muzeyinin rəisi, ehtiyatda olan polkovnik Əzizağa Qənizadə, hərbi hissənin nümayəndələri, tarixçilər, Milli Qəhrəman R.Nəsrəddinovun ailəsi və döyüş yoldaşları, 39 saylı orta məktəbin müəllim və şagirdləri iştirak ediblər. Tədbir iştirakçıları Azərbaycanın azadlıq və suverenliyi uğrunda canından keçmiş şəhidlərimizin əziz xatirəsini bir dəqiqəlik sükutla yad ediblər, sonra Azərbaycan Respublikasının Dövlət Himni səsləndirilib. Anım mərasimini giriş sözü ilə Nərimanov rayonu R.Nəsrəddinov adına 39 saylı tam orta məktəbin direktoru Tahirə Şükürova açaraq bildirib ki, Milli Azərbaycan Tarixi Muzeyi tərəfindən həmişə belə maarifləndirici tədbirlər həyata keçirilir. O, bildirib ki, Muzey tariximizin qanlı səhifələrini, milli qəhrəmanlarımızı tanıtmaq, ictimaiyyətə çatdırmaq işində çox fəal iştirak edir və buna görə Muzeyin rəhbərliyinə öz təşəkkürünü bildirib. T.Şükürova çıxışında qeyd edib ki, milli qəhrəmanları tanıdıb təbliğ eləmək, gələcək nəsillərə ötürmək də bizim öhdəmizə düşür ki, gənc nəslin mübarizə əzmi daha da qüvvətlənsin. Sonra Milli Azərbaycan Tarixi Muzeyinin direktoru, akademik Nailə Vəlixanlı çıxış edərək gələn qonaqları salamladı. Azərbaycanın ərazi bütövlüyü uğrunda canından keçmiş vətən övladlarının əziz xatirəsini yad edərək bildirdi ki, Azərbacan xalqı öz milli qəhrəmanlarını unutmamalıdır. Bu baxımdan Muzeydə keçirilən belə tədbirlər gənc nəslin maarifləndirilməsində böyük əhəmiyyətə malikdir. R.Nəsrəddinovun xidmət etdiyi hərbi hissənin zabiti, istefada olan polkovnik Çingiz Əliyev də çıxış edərək R.Nəsrəddinovun keçdiyi döyüş yolundan və qəhrəmanlığından bəhs etdi. Rafiq Hüseyn oğlu Nəsrəddinov 1961-ci il martın 18-də Bakı şəhərində anadan olub. O, 1992-ci ildə zabit kimi Milli Orduda xidmətə başlayıb, tank hərbi hissəsinin qərargah rəisi olub, Ağdərə rayonu istiqamətində bir sıra döyüşlərdə rəşadətlə vuruşub. 1992-ci il sentyabrın 6-da Ağdərə rayonunun Qızılqaya kəndi yaxınlığındakı döyüşdə son nəfəsinədək döyüşüb, qəhrəmanlıqla həlak olub. Bakı şəhərində, Şəhidlər Xiyabanında dəfn edilib. Oxuduğu Nərimanov rayonu 39 saylı məktəbə onun adı verilib. Məktəbdə büstü qoyulub, yaşadığı binaya xatirə lövhəsi vurulub. Tədbirdə həmçinin Milli Qəhrəman R.Nəsrəddinova həsr olunan filmin nümayişi oldu. Sonra tədbir iştirakçıları və qəhrəmanın ailə üzvləri Milli Qəhrəman R.Nəsrəddinovun keçdiyi döyüş yolundan, şücaətindən danışaraq onunla bağlı xatirələrini bölüşüblər. Qeyd edək ki, Milli Azərbaycan Tarixi Muzeyində R.Nəsrəddinovun şəxsi əşyaları nümayiş olunur. Tədbir bədii hissə ilə başa çatıb.