AMEA Milli Azərbaycan Tarixi Muzeyinin əməkdaşları Vətən tarixinin tədqiqi sahəsində daim yeni araşdırmalara imza atırlar. Belə ki, Muzeyin elmi katibi, t.ü.f.d. Fərhad Cabbarov bu mövzuda AZƏRTAC-a müsahibə vermişdir. Tarixçi alim Rusiyanın və Gürcüstanın arxiv və kitabxanalarında XX əsrin əvvəllərindəki erməni-azərbaycanlı münaqişəsinə dair araşdırmalar aparıb, əhəmiyyətli elmi faktlar və mənbələr əldə edib. AZƏRTAC-a müsahibəsində t.ü.f.d. Fərhad Cabbarov bildirib ki, Rusiyanın və Gürcüstanın arxiv və kitabxanalarında XX əsrin əvvəllərində, xüsusilə 1905-1906-cı illərdə erməni-azərbaycanlı münaqişəsi haqqında olduqca önəmli materiallar qorunub saxlanılır. “Həmin arxiv və kitabxanalardan əldə etdiyim çoxlu elmi mənbələr və əvvəllər apardığım tədqiqatlar əsasında “Cənubi Qafqazda erməni ekstremizmi: XIX əsrin II yarısı – XX əsrin əvvəlləri” adlı monoqrafiya yazıb çapa hazırlamışam”, - deyə alim bildirib. Yaxın günlərdə nəşr olunacaq kitabın elmi redaktoru - Muzeyin direktoru, akademik Nailə Vəlixanlıdır. Muzey kollektivi adından t.ü.f.d. F.Cabbarovu təbrik edir, gələcək elmi fəaliyyətində uğurlar arzulayırıq.