Milli Azərbaycan Tarixi Muzeyinin çoxsaylı arxeoloji kolleksiyaları arasında çoxtəbəqəli Azıx paleolit düşərgəsindən tapılmış daş alətlərə də rast gəlmək mümkündür. Bu alətlərin bir qismi mağaranın ən qədim VII-X təbəqələrindən tapılmışdır. Həmin daş alətlər 1,8-1,2 milyon il bundan öncə meydana gəlmiş Quruçay mədəniyyətini təmsil edirlər. Azıx düşərgəsinin daş məmulatı arasında 1974-1975-ci illərdə mərhum arxeoloq Məmmədəli Hüseynovun rəhbərliyi altında aparılmış qazıntılar zamanı VIII təbəqədən tapılmış 4-5 kq ağırlığında olan nəhəng alət diqqəti daha çox cəlb edir. Bu cür alətlər şərti olaraq qiqantolit və ya çoppinq-qiqantollit adlandırılır. Ümumiyyətlə, Azıx düşərgəsindən 3 ədəd belə daş alət tapılmışdır ki, onlardan biri hazırda Muzeyin Arxeologiya fondunda qorunur. Bu alət mağarada qədim insanların ilk məskunlaşmasından və məşğuliyyətlərindən xəbər verir.