Milli Azərbaycan Tarixi Muzeyində (MATM) Azərbaycan Respublikası Prezidentinin müvafiq Sərəncamlarına uyğun olaraq Bilik Fondu ilə birgə milli-mədəni, maarifçilik mövzularında mütəmadi seminarlar təşkil edilir. Növbəti belə seminar Azərbaycan Respublikası Prezidenti İlham Əliyevin 2018-ci ili “AXC-nin 100 illiyi” elan edən Sərəncamı münasibətilə keçirildi. Tədbir “M.Ə.Rəsulzadənin yaradıcılığında milli-mənəvi dəyərlərə baxış” mövzusunda baş tutdu. Azərbaycan Respublikasının Dövlət Himninin səsləndirilməsindən sonra Muzeyin elmi işçisi Əli Fərhadov giriş sözü ilə seminarı açdı və cənab İlham Əliyevin müvafiq Sərəncamının əhəmiyyətindən bəhs etdi. Daha sonra Seminarda Azərbaycan Respublikası Bilik Fondunun məsləhətçisi Sevinc Babayeva çıxış edərək Bilik Fondunun elmi-kütləvi tədbirlərin keçirilməsindəki rolundan danışdı. Sonra Muzeyin elmi işçisi, t.ü.f.d. Fuad Ağayev “AXC Ordusunda qeyri-azərbaycanlılar” mövzusunda məruzə oxudu və Qafqaz İslam Ordusunun, AXC Ordusundakı qeyri-azərbaycanlıların milli istiqlalımızdakı rolunu izah etdi. Daha sonra Muzeyin elmi işçisi Əli Fərhadov “M.Ə.Rəsulzadənin yaradıcılığında milli-mənəvi dəyərlərə baxış” mövzusunda çıxış etdi, M.Ə.Rəsulzadənin milli-mədəni quruculuqda və Azərbaycançılıq ideologiyasının inkişafındakı rolundan danışdı. Ən son Səbail rayonu H.Mahmudbəyov adına 2 saylı Texniki-Humanitar Elmlər Liseyinin tarix müəllimi Sevil Nəsibova çıxış etdi. Çıxışlarda görkəmli ictimai-siyasi xadim, AXC-nin qurucusu və baş ideoloqu M.Ə.Rəsulzadənin milli, siyasi maarifçilik sahəsindəki fəaliyyəti, mənəvi dəyərlərə baxışı, yaradıcılığı haqqında geniş məlumat verildi. Tədbirdə Səbail rayonu H.Mahmudbəyov adına 2 saylı Texniki-Humanitar Elmlər Liseyinin yuxarı sinif şagirdləri də iştirak etdi. İştirakçıların sualları məruzəçilər tərəfindən ətraflı cavablandırıldı.