Böyük Azərbycan xeyriyyəçisi Hacı Zeynalabdin Tağıyevin (1838-1924) 180 illiyi münasibəti ilə Azərbaycan Milli İncəsənət Muzeyində xatirə gecəsi keçirilmişdir. Tədbirdə AMEA Milli Azərbaycan Tarixi Muzeyinin elmi katibi, t.ü.f.d. Fərhad Cabbarov H.Z.Tağıyevin sahibkarlıq və xeyriyyəçilik fəaliyyəti haqqında məruzə ilə çıxış etmişdir. Məruzədə mesenatın Azərbaycan iqtsadiyyatının, mədəniyyətinin, təhsilinin inkişafında xidmətləri, onun təşəbbüskarı olduğu ictimai və iqtisadi layihələrin əhəmiyyəti haqqında ətraflı məlumat verilmişdir. Tədbirdə həmçinin H.Z.Tağıyevin nəticəsi Nazim Abdullayev, nəvəsi Rəsmi Abdullayevin həyat yoldaşı Səidə Mirizadə ailə xatirələri, H.Z.Tağıyevə məxsus xatirə əşyalarının tarixçəsi haqqında məlumat verdilər. Bərpaçı-rəssam Natiq Səfərov H.Z.Tağıyevin portretinin bərpasından, bu işdə Azərbaycanın ilk ixtisaslı bərpaçısı Fərhad Hacıyevin xidmətlərindən danışdı. Tədbirin sonunda məruzəçilər auditoriyanın suallarını cavablandırdılar. Qeyd edək ki, AMEA Milli Azərbaycan Tarixi Muzeyi tərəfindən H.Z.Tağıyevin 180 illik yubileyi ilə əlaqədar ilboyu müxtəlif tədbirlərin keçirilməsi nəzərdə tutulub.