Milli Azərbaycan Tarixi Muzeyinin Arxeologiya və Xüsusi fondlarında qiymətli arxeoloji metallar qorunub saxlanılır. Bunların arasında antik zərgərlik məmulatları - ilanbaşı bilərziklər xüsusi yer tutur. Gümüş və tuncdan olan ilanbaşlı bilərziklər e.ə.V – b.e. I əsrlərinə aid olub Azərbaycan ərazisində aparılan arxeoloji qazıntılar zamanı Mingəçevirdən aşkarlanmışdır. Hələ tunc dövründən geniş yayılmış sonluq formaları kimi sırğa, boyunbağı və bilərziklər zərgərlər tərəfindən geniş istifadə olunurdu. Bu motivin zinət əşyalarında geniş vüsət tapması əcdadlarımızın qədim inancı - ilana sitayişi təcəssüm etdir. Muzeyin Xüsusi Fondunun müdiri, t.ü.f.d. Afət Rüstəmbəyovanın qeyd etdiyinə görə, ilan ağıl, müdriklik və digər müsbət keyfiyyətləri təcəssüm etdirir, zəhərinin təsirinə görə fövqəltəbii qüvvə kimi qəbul olunurdu. İlana sitayişi indiyədək şifahi xalq yaradıcılığında - nağıllarda, əfsanələrdə, əsatirlərdə, toponimlərdə, arxeoloji və tarixi abidələr üzərindəki təsvirlərdə rast gəlmək mümkündür. Muzey fondlarında qorunan bu bilərziklər Azərbaycan etnoqrafiyasının tədqiqi baxımından da əhəmiyyətlidir və öz tədqiqatçılarını gözləyir.