Milli Azərbaycan Tarixi Muzeyinin əməkdaşları mütəmadi olaraq bölgələrdə maarifçilik və ictimai, bədii mövzulu tədbirlərdə iştirak edirlər. Belə ki, Muzeyin əməkdaşı Gülnar Mirzəyeva Tərtər rayonunda çəkilişi baş tutan “Günahsızlar” sənədli filmində iştirak etmişdir. Film 4 iyul 2017-ci il tarixində erməni silahlı qüvvələrinin atəşkəsi pozması nəticəsində şəhid olmuş Füzuli rayonu, Alxanlı kənd sakinləri Sahibə Quliyeva və 18 aylıq nəvəsi Zəhra Quliyeva, Xocalı qurbanları, o cümlədən digər azyaşlı şəhidlərin xatirəsinə həsr olunmuşdur. Muzey əməkdaşı filmdə orta məktəbdə dərs deyən müəllim və erməni terroristlərinin gülləsi ilə şəhid olan ana obrazlarını canlandırmışdır. “Neftçalada qadınların sosial inkişafına dəstək” İctimai Birliyi tərəfindən və Neftçala, Tərtər rayonları İcra Hakimiyyətlərinin dəstəyilə filmin çəkilişi baş tutmuşdur. Sənədli film şairə və ictimai xadim Gülqədəm Mirzəzadənin eyni adlı elegiyası əsasında, görkəmli rejissor Mahir Dərviş tərəfindən, ADTV - online tv-də çəkilmişdir. “Günahsızlar” sənədli filminin çəkilişində 2016-cı il, aprel döyüşlərinin şəhidi, tərtərli gizir Nicat İsgəndərovun atası Bəhruz müəllim, həmçinin Tərtər məktəbliləri də iştirak etmişdirlər. Allah şəhidlərimizə rəhmət eləsin!