Milli Azərbaycan Tarixi Muzeyi daim şagird və tələbələrin maraq dairəsindədir və mütəmadi ziyarət edilir. “Ölkəmizi tanıyaq” devizi ilə keçirilən tur-aksiya çərçivəsində Naxçıvan Muxtar Respublikasından Bakıya gələn məktəblilər Milli Azərbaycan Tarixi Muzeyində olublar. Məktəblilər Muzeydə ölkəmizin zəngin tarixini əks etdirən sərgi və eksponatlarla ətraflı tanış olublar. Burada şagirdlərə ayrı-ayrı əsrlərə aid müxtəlif eksponatlar, həmçinin bölgələrdə arxeoloji qazıntılar zamanı tapılmış arxeoloji materiallar barədə məlumatlar verilib. Muzeydə açılmış “Azərbaycan Şirvanşahlar dövləti” adlı sərgi məktəblilərdə böyük maraq doğurub. Bildirilib ki, Muzeydə müxtəlif dövrlərə aid 300 mindən çox eksponat qorunub saxlanılır. Qeyd edək ki, layihənin əsas məqsədi məktəbliləri ölkəmizin tarixi, mədəni irsi, adət-ənənələri, nailiyyətləri ilə yaxından tanış etmək, ölkəmizin müasirləşən siması barədə əyani təsəvvür yaratmaqdır.