Milli Azərbaycan Tarixi Muzeyinin kolleksiyası Azərbaycan Xalq Cümhuriyyəti dövrünə aid materiallarla zəngindir. Silahlar və Bayraqlar fondunda Cümhuriyyət tarixini əks etdirən bir sıra material qorunub saxlanılır. Bu materiallar içərisində unikal bir eksponat mövcuddur. Bu ipək parça üzərində türk əsgərlərinin şəkilləri, hərbi atributlarının təsvir olunduğu və yazısı olan bir eksponatdır. Təsvirli parça Qafqaz İslam Ordusunun əsgərlərinin şərəfinə hazırlanmışdır. Parçanın üzərində bu sözlər yazılmışdır: “Evladi-şühəda məa ülüvvi izzə. Ləin şaşaaha alə sirri-keys-didar”. (Tərcüməsi belədir: Şəhid övladları uca şərəflə birlikdədir. Vallah onların parlaqlığı yarın (ilahi) idrak sirrinin də üzərindədir).