Milli Azərbaycan Tarixi Muzeyində vaxtaşırı olaraq incəsənət tarixi mövzusunda tədbirlər keçirilir. Növbəti belə seminar Rusiya İnformasiya-Mədəniyyət Mərkəzi ilə birgə təşkil edilmişdir. “İncəsənətə dair söhbətlər” layihəsi çərçivəsində baş tutan mühazirə-seminar Azərbaycan SSR Xalq rəssamı, qrafika ustası, ictimai xadim İsmayıl Axundovun həyat və yaradıcılığına həsr olunmuşdur. Muzeyin Xarici əlaqələr və elmi-kütləvi iş şöbəsinin elmi işçisi, t.ü.f.d. Fuad Ağayev dinləyicilərə Xalq rəssamı haqqında ətraflı məlumat vermişdir. Məruzəçi bildirib ki, Xalq rəssamı İ.Axundov teatr dekorasiya sənətinə müəyyən yeniliklər gətirmiş, operettalara əlvan tərtibatlar işləmişdir. O, təsviri sənətin müxtəlif sahələrində qazandığı nailiyyətlərə görə respublikanın “Əməkdar incəsənət xadimi” (1940) və “Xalq rəssamı” (1960) fəxri adlarına layiq görülüb. 1950-ci ildə Stalin mükafatı ilə təltif olunub. Tədbirin sonunda dinləyicilərin sualları məruzəçi tərəfindən ətraflı cavablandırılmışdır.