Azərbaycan Respublikasının Prezidenti cənab İlham Əliyevin “1918-ci il azərbaycanlıların soyqırımının 100 illiyi haqqında” sərəncamı əsasında Milli Azərbaycan Tarixi Muzeyinin elmi işçiləri mütəmadi olaraq təhsil müəssisələrində maarifləndirici tədbirlər keçirir. “31 Mart Soyqırımı”nın 100 illiyinə həsr olunmuş növbəti tədbir İ.Əfəndiyev adın Elitar gimnaziyada keçirilmişdir. Muzeyin Xarici əlaqələr və elmi-kütləvi iş şöbəsinin müdiri Emin Dadaşov təhsil ocağının şagirdləri qarşısında “Soyqırımlar tarixinin 31 mart günü” adlı mühazirə ilə çıxış etmişdir. Tədbirdə XX əsrin əvvəllərində Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə bolşevik-daşnak silahlı dəstələrinin azərbaycanlılara qarşı törətdiyi soyqırımı cinayətləri haqqında ətraflı məlumat verilmişdir. Fotomateriallar və arxiv sənədlərindən çıxarışların nümayişi ilə müşaiyət olunan mühazirə aktiv diskussiya şəraitində keçmişdir. Tədbirin sonunda 31 mart soyqırımının dünya ictimaiyyətinə çatdırılması istiqamətində internet və sosial şəbəkələrin geniş istifadə olunması təklifi müəllim və şagird heyəti tərəfindən maraqla qarşılanmışdır. Milli Azərbaycan Tarixi Muzeyinin elmi işçiləri tərəfindən “31 Mart Soyqırımı”nın 100 illiyinə həsr olunmuş maarifləndirici tədbirlərin muzeyin xaricində keçirilməsi nəzərdə tutulub.