Məşhur “Qızıl adam” Qazaxıstan Respublikasının tarixi rəmzlərindən biri olub, qızıldan hazırlanan paltar geymiş sak döyüşçüsünün simvoludur. Milli Azərbaycan Tarixi Muzeyi ilə Qazaxıstan Respublikası Milli Muzeyi arasında razılaşma əldə olunmuşdur. Bu razılaşmaya əsasən “Qızıl adamın dünya muzeylərinə səyahəti” beynəlxalq sərgi layihəsi çərçivəsində Bakıda “Böyük çölün mirası: zərgərlik sənətinin şah əsərləri” adlı sərgi keçiriləcək. Bu yaxınlarad Qazaxıstan Respublikası Milli Muzeyinin nümayəndələri Milli Azərbaycan Tarixi Muzeyində olublar. Muzeyin direktoru, akademik Nailə Vəlixanlı ilə görüşən qonaqlar təşkil olunacaq sərginin plan və tərtibatı haqqında danışıblar. Tarixdə ilk dəfə olaraq Azərbaycana Qazaxıstan zərgərlik sənətinin 140-a yaxın nümunəsi, o cümlədən “Qızıl adam”ın tam geyimi gətiriləcək. Sərginin təntənəli açılışı və mətbuat konfransı 2018-ci il 22 may tarixində Milli Azərbaycan Tarixi Muzeyində baş tutacaq.