Milli Azərbaycan Tarixi Muzeyində Elmir Şaripovun “Азербайджанцы в обороне Брест-Литовской крепости” (“Azərbaycanlılar Brest-Litovsk qalasının müdafiəsində”) adlı kitabının təqdimatı keçiriləcək. Kitabın elmi məsləhətçisi t.e.d., prof. Nurulla Əliyev, kitabın rəyçiləri t.e.d., dosent Mehman Süleymanov, t.ü.f.d. Səbuhi Əhmədovdur. Kitab Azərbaycan Respublikasının Prezidenti yanında Strateji Araşdırmalar Mərkəzinin dəstəyi ilə nəşr olunmuşdur. Kitab II Dünya müharibəsi illərində 1941-ci ilin iyununda azərbaycanlı döyüşçülərin faşist alman işğalçılarına qarşı Brest-Litovsk qalasının müdafiəsindəki iştirakına həsr olunmuşdur. 80-dən artıq azərbaycanlı döyüşçünün adının qeyd olunduğu kitabda onlardan bir çoxunun qəhramanlığı, həmçinin, müharibədən sağ çıxmış insanların sonrakı taleyindən bəhs edilmişdir. Kitaba daxil edilmiş epizodlar həmin mübarizədə sağ qalmış iştirakçıların xatirələri, döyüşlərdə həlak olmuş qəhrəmanların yaxınlarının xatirələri, sorğu məktubları, fotoşəkillər, qəzetlər, publisist kitablara əsaslanaraq yazılmışdır. Kitabda, həmçinin, Milli Azərbaycan Tarixi Muzeyinin fondlarında qorunan zəngin materiallardan istifadə edilmişdir. Kitabın təqdimatı 2018-ci il may ayının 4-də Milli Azərbaycan Tarixi Muzeyində keçiriləcək.