Milli Azərbaycan Tarixi Muzeyinin Sənədli Mənbələr Fondunda Azərbaycan Cümhuriyyəti xadimlərinə, mühacirlərə aid XX əsrin I yarısı dövrü fotoşəkilləri mühafizə olunur. Onlar Türkiyənin Anadolu Universitetinin professoru Zaur Məhərrəm tərəfindən Muzeyə hədiyyə edilmişdir. Təsvirlərin əksəriyyətində qürbətdə ömür sürən siyasi mühacirlər əks olunub. Onların arasında “Müsavat” partiyasının təsisçiləri və fəalları, habelə Cümhuriyyət xadimləri Məhəmməd Əmin Rəsulzadə, Abbasqulu Kazımzadə, Mirzəbala Məmmədzadə, Xosrov bəy Sultanov, Ceyhun bəy Hacıbəyli və başqalarının Polşa, Almaniya, Fransada çəkilmiş fotoşəkilləri var. Azərbaycan Cümhuriyyətinin banilərindən olan Məhəmməd Əmin Rəsulzadənin 1908-1955-ci ilərə aid şəkilləri onun dolğun siyasi fəaliyyətinin az qala yarıməsirlik dövrünü ehtiva edir. Azərbaycanın milli məfkurəli ictimai siması, ədib Əli bəy Hüseynzadənin fotoşəkli XX əsrin əvvəllərində Bakıda çəkilmişdir. Yurdumuzun nüfuzlu siyasi xadimi, AXC parlamentinin sədri Əlimərdan bəy Topçubaşovun Krımın tanınmış ictimai xadimi, “Tərcüman” qəzetinin təsisçisi və redaktoru İsmayıl bəy Qaspralı ilə Orenburqda çəkilmiş fotoşəkli də həmin dövrə aiddir. Məşhur sahibkar və xeyriyyəçi Hacı Zeynalabdin Tağıyevin Əli bəy Hüseynzadəyə xatirə olaraq verdiyi, şəxsən imza qoyduğu fotoşəkli 1910-cu ildə Bakıda çəkilmişdir. Zəmanəsinin əyani şəhadəti olan bu fotoşəkillər Cümhuriyyət və mühacirət dövrünün keşməkeşlı tarixini araşdıran tədqiqatçılar üçün böyük əhəmiyyətə malikdir.