Milli Azərbaycan Tarixi Muzeyi xarici dövlətlərlə əlaqələrini daim genişləndirir. Bu gün Milli Kitabxanada Azərbaycan Respublikasının Mədəniyyət Nazirliyi, Rumıniyanın Azərbaycandakı Səfirliyi, Rumıniya Prezident Administrasiyasının nəzdində Kotroçeni Milli Muzeyinin və Azərbaycan Milli Kitabxanasının birgə təşkilatçılığı ilə Rumıniyanın Böyük Birliyinin 100 illiyi münasibətilə “Böyük Birlik. I Dünya Müharibəsindəki Qələbədən Böyük Rumıniya Hökmdarlarının Taclandırılmasına qədər” adlı foto sərgi keçirilib. Sərginin açılışında millət vəkilləri, Azərbaycandakı səfirliklərin nümayəndələri, mədəniyyət və incəsənət xadimləri və media işçiləri iştirak ediblər. Tədbirdə AMEA Milli Azərbaycan Tarixi Muzeyinin direktor müavinləri t.ü.e.d dos. Nərgiz Əliyeva, t.ü.f.d dos. Məhfuzə Zeynalova, Xarici əlaqələr və elmi-kütləvi iş şöbəsinin müdiri Emin Dadaşov və muzeyin İctimaiyyətlə əlaqələr şöbəsinin müdiri Aynur Babayeva iştirak ediblər. Tədbiri Milli Kitabxananın direktoru Kərim Tahirov açaraq qonaqları salamlamış, Azərbaycan Xalq Cümhuriyyətinin 100 illik yubileyi ilə Rumıniyanın Böyük Birliyinin yaranmasının 100-cü ildönümünün eyni vaxta təsadüf etməsinin çox fərəhli hal olduğunu söyləmiş, hər iki ölkənin qədim tarixi köklərə malik olduğunu bildirmişdir. Sonra Rumıniyanın Azərbaycandakı səfiri cənab Dan İanku və Rumıniyanın Prezident Administrasiyası nəzdində fəaliyyət göstərən Kotroçeni Muzeyinin Baş Direktoru Liviu Sebastian Jikman çıxış edib bildiriblər ki, 2018-ci il həm Azərbaycan, həm də Rumıniya üçün önəmli il hesab olunur. Rumıniyanın bütün böyük vilayətlərinin tarixi birləşməsi hadisəsinin tamamlanmasından 100 il ötür və 1 dekabr 1918-ci il Rumıniyanın Milli Günü kimi qeyd olunur. Tədbirdən sonra Muzey əməkdaşları ilə Ruminiyanın Azərbaycandakı səfiri cənab Dan İanku və Kotroçeni Muzeyinin Baş Direktoru Liviu Sebastian Jikman ilə masa arxasında görüş keçirilib. Görüşdə Rumıniya˗Azərbaycan mədəniyyəti və tarixinin təbliğ olunması haqqında müzakirələr olunub və gələcək əməkdaşlıq haqqında danışıqlar aparıllıb. Danışıqlarda hər iki ölkənin muzeyləri arasında qarşılıqlı əlaqələrin yaradılması, elmi seminar və konfransların təşkili, ümumi nəşrlərin həyata keçirilməsi müzakirə olunub. Milli Azərbaycan Tarixi Muzeyinin rəhbərliyi tərəfindən Azərbaycan və Rumıniya maddi-mədəniyyətinin təbliğ olunması üçün qarşılıqlı səyyar sərgilərin təşkil olunması təklifi irəli sürülüb. Təklif qarşı tərəfdən dəstəklənib və belə sərgilərin dövlətlərimizin mədəni əlaqələrinin qurulması baxımından mühüm əhəməyyətə malik olduğu vurğulanıb. Sonda Rumıniyanın Kotroçeni Muzeyi tərəfindən Milli Azərbaycan Tarixi Muzeyinin əməkdaşlarına muzeyin kataloq və bukletləri hədiyyə olunub. Hər iki tərəf bu görüşdən məmnun olduğunu bildirib.