Naxçıvan Dövlət Musiqili Dram Teatrında “Naxçıvan İslam Mədəniyyətinin Paytaxtı-2018”in açılış mərasimi olub. Tədbirdə Naxçıvan Muxtar Respublikası Ali Məclisinin Sədri Vasif Talıbov, AMEA-nın prezidenti, akademik Akif Əlizadə, AMEA-nın vitse-prezidenti, akademik İsa Həbibbəyli, AMEA Milli Azərbaycan Tarixi Muzeyinin direktoru, akademik Nailə Vəlixanlı, AR Mədəniyyət naziri Əbülfəz Qarayev, İslam Təhsil, Elm və Mədəniyyət Təşkilatının Baş direktoru Əbdüləziz Osman əl-Tuveycri, AMEA N.Gəncəvi adına Milli Azərbaycan Ədəbiyyat Muzeyinin direktoru, akademik Rafael Hüseynov, AMEA Z.Bünyadov adına Şərqşünaslıq İnstitutunun direktoru, akademik Gövhər Baxşəliyeva, və b. işrirak ediblər. Əvvəlcə iştirakçılar ümummilli lider Heydər Əliyevin abidəsini ziyarət edərək, önünə gül dəstələri qoyub, ulu öndərin xatirəsinə ehtiramlarını bildiriblər. Daha sonra Heydər Əliyev Muzeyində dahi şəxsiyyətin həyatı, siyasi və dövlətçilik fəaliyyəti ilə bağlı eksponatlara baxış keçirilib. Tədbir iştirakçıları, həmçinin fotoqraf Hüseyn Bağırovun “Mənim Naxçıvanım” fotosərgisi ilə tanış olublar. “Qurani-Kərim”in tilavəti ilə başlayan tədbirdə Naxçıvan Dövlət Televiziyasının hazırladığı “İslam Mədəniyyətinin Paytaxtı Naxçıvan” filmi nümayiş etdirilib. Mərasimi Naxçıvan Muxtar Respublikası Ali Məclisinin Sədri Vasif Talıbov açaraq bildirib ki, İslam Əməkdaşlıq Təşkilatına üzv dövlətlərin mədəniyyət nazirlərinin 2009-cu ilin oktyabr ayında Bakıda keçirilmiş konfransında Naxçıvan şəhəri İslam Mədəniyyətinin Paytaxtı elan olunub. Ali Məclisin Sədri Naxçıvan şəhərində əlamətdar tarixi günlərin yaşandığını söyləyərək, tədbirində iştiraka görə qonaqlara təşəkkürünü bildirib. Qeyd edib ki, Naxçıvan artıq orta əsrlərdə İslam mədəniyyətinin əsas mərkəzlərindən birinə çevrilmişdi. O, ümummilli lider Heydər Əliyevin İslam ölkələri ilə əməkdaşlığa önəm verdiyini, Prezident İlham Əliyevin də dini-mənəvi dəyərlərimizin yaşadılmasına xüsusi diqqət göstərdiyini qeyd edib. Tədbirdə, həmçinin AR Mədəniyyət naziri Əbülfəs Qarayev, İslam Təhsil, Elm və Mədəniyyət Təşkilatının Baş direktoru Əbdüləziz Osman əl-Tuveycri və AMEA-nın prezidenti, akademik Akif Əlizadə çıxış edərək Azərbaycandakı multikultural, tolerant ənənələrdən danışıblar. Sonda Naxçıvan Dövlət Filarmoniyasının konserti olub.