Milli Azərbaycan Tarixi Muzeyinin Sənədli Mənbələr Fondunda şəhidlik zirvəsinə ucalaraq Milli Qəhrəman adınnı qazanan bir çox vətən övladının materialı mühafizə edilir. Onların arasında Məzahir İzzət oğlu Rüstəmovun (1960-1992) materiallarının xüsusi yeri var. O, tanınmış filosof alim İzzət Rüstəmovun oğludur. Məzahir Rüstəmov Bakıda ziyalı ailəsində, vətən sevgisi ilə böyüyüb. 1990-cı ildən Azərbaycan Dövlət Mətbuat Komitəsinin şöbə müdiri vəzifəsində çalışan Məzahir Rüstəmov iki ildən sonra vətənin harayına səs verərək könüllü olaraq Gədəbəy cəbhəsinə yollanmışdır. Bunu onun 1992-ci il martın 20-də Komitənin sədri, şair Sabir Rüstəmxanlının adına yazdığı ərizəsi sübut edir. Onun materialları arasında səhra geyimində çəkilmiş fotoşəkli, tabor komandirinə yazdığı raport, habelə hərbi andın mətni diqqəti cəlb edir. Şücaətli döyüşçu həmin ilin avqustunda erməni hərbi birliklərinin Mutudərəyə hücumu zamanı əl qumbarasını partladıb, bir çox düşməni məhv edərək həlak olmuşdur. Azərbaycan Respublikası prezidentinin 5 fevral 1993-cü il tarixli, 457 saylı fərmanı ilə Rüstəmov Məzahir İzzət oğlu ölümündən sonra "Azərbaycanın Milli Qəhrəmanı" adına layiq görülmüşdür. Bakı şəhərinin Şəhidlər Xiyabanında dəfn edilib. Məzahir Rüstəmovun kolleksiyasında Qarabağ müharibəsi tarixinin başqa maraqlı sənədləri də var. ABŞ-ın paytaxtı Vaşinqton şəhərindəki “News” muzeyinin önündə şəhid jurnalistlərin siyahısı olan lövhədə qəhrəman hərbi müxbirlərimiz Salatın Əsgərova və Çingiz Mustafayevin adları çəkilmişdir. Bunu müvafiq şəkillərdə görmək olur. Xankəndinin yaxınlığında yerləşən Kərkicahan kəndini müdafiə edərək həlak olan Ceyhun Əliyevin ölümü haqqında bildiriş də çox dəyərli tarixi sənəddir. Bu materiallar 2015-ci il mart ayının 2-dən Sənədli Mənbələr Fondunda qorunub saxlanılır. Qarabağ müharibəsi tarixinin tədqiqi və gənc nəsillərə təbliği baxımından mühüm əhəmiyyət daşıyır. Allah şəhidlərimizə rəhmət eləsin!