Milli Azərbaycan Tarixi Muzeyinin fondlarına vətənimizin tarixi, qəhrəmanlıq keçmişimizlə bağlı müxtəlif materiallar daxil olmaqdadır. Bu materiallar arasında dövlətimizin bütövlüyü uğrunda gedən döyüşlərdə şəhid və itkin düşmüş hərbçilərimizin əşyaları da var. Muzeyə yeni daxil olmuş materiallar Azərbaycanın Milli Qəhrəmanı Eldar Xəlil oğlu Xəlilova aiddir. Muzeyin elmi işçisi Aygün Quliyeva, Milli Qəhrəmanın şəxsi əşyalarını - hərbi geyimləri, cib kitabçası, üzük və E.Xəlilov haqqında çap olunmuş kitabları, şəhidin ailə üzvlərindən qəbul edərək muzeyə təhvil vermişdir. Qeyd edək ki, Eldar Xəlilov (1976-1995) Ermənistan Respublikasının Zəngibasar rayonunda dünyaya gəlmiş, sonralar məcburi köçkün kimi Bakıda məskunlaşmışdır. 1994-cü ildə hərbi xidmətə çağırılan Eldar Xəlilov, 1995-ci il 17 mart dövlət çevrilişinə cəhd zamanı silahlı qarşıdurma zamanı qəhrəmancasına həlak olmuşdur. Azərbaycan Respublikası Prezidentinin 4 aprel 1995-ci il tarixli, 307 saylı fərmanı ilə Azərbaycan Respublikasının Konstitusiya dövlət quruluşunun müdafiəsi, onun müstəqilliyinin qorunub saxlanılması və dövlət çevrilişi cəhdinin qarşısının alınması zamanı göstərdiyi şəxsi qəhrəmanlıq və şücaətinə görə Eldar Xəlil oğlu Xəlilov (ölümündən sonra) Azərbaycanın Milli Qəhrəmanı adına layiq görülmüşdür. Allah rəhmət eləsin!