Milli Azərbaycan Tarixi Muzeyində AMEA Rəyasət Heyətinin sərəncamına əsasən yeni - Qadınlar Şurası fəaliyyətə başlayıb. Muzeydə yaradılan Qadınlar Şurasının əsas məqsədi qadın əməkdaşların mənafeyini qorumaq, onların sosial, məişət problemlərinin həllində yardım etmək və qayğı göstərmək, müəyyən problemlər yaranarsa, aidiyyatı qurumlar qarşısında məsələ qaldırmaq, ən əsası elmi işlərdə öz tövsiyyələrini vermək və dəstək olmaq kimi funksiyaları həyata keçirməkdir. Bu gün Milli Azərbaycan Tarixi Muzeyində Qadınlar Şurasının sədri və tərkibinin seçilməsi üçün iclas keçirilib. Muzeyin direktoru, akademik Nailə Vəlixanlının rəhbərliyi ilə keçirilən tədbirdə AMEA Qadınlar Şurasının sədri, prof. Rəna Mirzəzadə, Qadınlar Şurasının “Elm və mənəviyyat” bölməsinin rəhbəri, f.ü.e.d. Ziba Ağayeva, Şuranın Elmi problemlər üzrə bölüm rəhbəri və elmi koordinatoru f.ü.f.d. Samirə Kadiyeva iştirak ediblər. AMEA Qadınlar Şurasının sədri, prof. Rəna Mirzəzadə əməkdaşlara təşkilatın vəzifə və səlahiyyətləri haqqında ətraflı məlumat verib. Tədbirdə qadınların cəmiyyətdəki rolundan, elm sahəsində uğurlar qazanmış ziyalı xanımlarımızın fəaliyyətindən bəhs edilib. Bildirilib ki, Azərbaycan qadınları tarix boyu xalqımızın taleyində əhəmiyyətli rol oynayıb, öz müdrikliyi, mərdliyi və mübarizliyi ilə fərqlənib, milli-mənəvi dəyərlərimizin, cəmiyyətimizin sağlamlığının keşiyində dayanıb, tərəqqi və inkişafın önündə addımlayıblar. Sonra Muzeyin yeni yaradılan Qadınlar Şurasının sədri və tərkibi seçilib.