I Beynəlxalq Ənənəvi Türk Məzar Daşları Simpoziumunun açılış mərasimi Milli Azərbaycan Tarixi Muzeyində keçirilmişdir. Tədbirdə Türkiyə və Azərbaycanın elm xadimləri iştirak etmişdir. Simpoziumun təşkilatçıları Türkiyənin Ərciyəs Universiteti, Türk Tarih Qurumu, Xəzər Universiteti və Milli Azərbaycan Tarixi Muzeyidir. Simpoziumun açılış mərasimi Azərbaycan və Türkiyə Respublikalarının Dövlət Himnlərinin səsləndirilməsi ilə işə başladı. Tədbiri açan Xəzər Universitetinin təsisçi rektoru, professor Hamlet İsaxanlı iştirakçıları salamladı və bu simpoziumun keçirilməsində dəstəyə görə Muzeyin direktoru, akademik Nailə Vəlixanlıya təşəkkür etdi. Sonra akademik Nailə Vəlixanlı çıxış edərək, Muzeyə gələn qonaqlara təşəkkür etdi. Nailə xanım öz çıxışında Ermənistanda və işğal edilən torpaqlarımızda məhv edilən tarixi abidələrimizin, o cümlədən məzar daşlarının tədqiqinin əhəmiyyətini vurğuladı. Ermənidilli alban abidələrinin də Azərbaycanın tarixi irsi olduğunu və araşdırılmasının vacibliyini qeyd etdi. Daha sonra Muzeyin elmi işlər üzrə direktor müavini, t.ü.e.d. Nərgiz Əliyeva, Ekspozisiyanın təhlükəsizliyi üzrə direktor mü¬a¬vi¬ni, ekspo-zisiya müdiri, t.ü.f.d. Həbibə Əliyeva, Ərciyəs Universitetinin Ədəbiyyat fakültəsi Sənət tarixi kafedrasının əməkdaşı, dos.dr. Cəlil Arslan çıxış etdilər. Ortaq türk tarixinin araşdırılmasında bu kimi beynəlxalq əhəmiyyətli tədbirlərin elmi əhəmiyyətini və gələcəkdə də təşkil edilməsinin vacibliyini qeyd etdilər. Çıxışlardan sonra akademik Nailə Vəlixanlıya, t.ü.e.d. Nərgiz Əliyevaya, t.ü.f.d. Həbibə Əliyevaya, professor Hamlet İsaxanlıya plakatlar, hədiyyələr və dos.dr. Cəlil Arslana Muzeyin nəfis tərtibatlı nəşrləri təqdim edildi. Açılış mərasimi bitdikdən sonra simpoziumun iştirakçıları Muzeyin zallarını, Qafqaz İslam Ordusu və Bakının azad olunmasının 100 illiyinə həsr olunmuş “Millət sizə minnətdardır!” sərgisini ziyarət etdilər. Simpoziumun daha sonrakı çıxışları Xəzər Universitetində davam edəcəkdir. Qeyd edək ki, 19-21 sentyabr 2018-ci il tarixində Bakıda keçirilən Simpoziumun əsas mövzuları bunlardır: I. Türk dünyasında məzar mədəniyyəti a) Dəfn adətləri; b) Rituallar (ayinlər); c) İnanclar; d) Adət-ənənələr; II. Türk dünyasında məzar strukturları a) Kurqanlar; b) Balballar; c) Türbə və günbəzlər; d) Məzarlıqlar və məzar daşları; III. Türk məzar daşlarının dövri və regional xüsusiyyətləri; IV. Türk məzar strukturlarında tipoloji və terminoloji problemləri; V.Türk məzar strukturlarında bəzək və ikonoqrafiya.