Bolqarıstan Elmlər Akademiyasının sədr müavini, professor Vasil Nikolov, Sofiya şəhərinin merinin müavini Dr. Todor Çobanov və onları müşayiət edənlər AMEA Milli Azərbaycan Tarixi Muzeyini ziyarət etmişdirlər. Bolqarıstanlı qonaqlara muzeyin tarixi barədə ətraflı məlumat verən muzeyin direktoru, akademik Nailə Vəlixanlı bildirmişdir ki, Bakının ən gözəl memarlıq abidələrindən olan bu bina 1895-1897-ci illərdə tikilmiş və Azərbaycan milyonçusu, mesenat Hacı Zeynalabdin Tağıyevin mülkü olmuşdur. Akademik N.Vəlixanlı muzeyin həm də AMEA strukturunda elmi-tədqiqat və mədəni-maarif müəssisəsi funksiyasını yerinə yetirdiyini və muzey binasının Azərbaycan Prezidenti İlham Əliyevin göstərişi ilə əsaslı təmir olunduğunu da nəzərə çatdırmışdır. Bolqarıstan Elmlər Akademiyasının vitse-prezidenti, professor Vasil Nikolov və Sofiya şəhərinin vitse-meri Dr. Todor Çobanov Azərbaycanın qədim və orta əsrlər dövrünə aid muzeydə nümayiş etdirilən maddi mədəniyyət nümunələri ilə yaxından tanış olmuşdur. Həmçinin H.Z.Tağıyevin xatirə muzeyini də ziyarət etmişdirlər. Qonaqlar muzeydə görkəmli xeyriyyəçi H.Z.Tağıyevin həyatı və fəaliyyətinə dair fotoşəkillər, tarixi sənədlər, ona məxsus qiymətli əşyalarla da tanış olmuşlar. Buradakı məişət əşyaları və tarixi sənədlər onlarda zəngin təəssürat yaratmışdır. Bolqarıstanlı qonaqlar ziyarətdən məmnun qaldıqlarını bildirmiş, Azərbaycan və Bolqarıstan arasındakı tarixi, elmi-mədəni əlaqələrin davamını arzu etmişdirlər. Sonda Muzeyin direktoru, akademik Nailə Vəlixanlı Bolqarıstan Elmlər Akademiyasının vitse-prezidenti, professor Vasil Nikolova və Sofiya şəhərinin vitse-meri Dr. Todor Çobanova muzeyin nəfis tərtibatlı nəşrlərini hədiyyə etmişdir.