Bakı Ekspo Mərkəzində "ADEX-2018” üçüncü Azərbaycan Beynəlxalq müdafiə sərgisi davam edir. "ADEX-2018” sərgisində 29 ölkədən 224 şirkət və rəsmi nümayəndə heyətləri iştirak edir. Sərginin iştirakçıları olan bir sıra ölkələr əvvəlki illərlə müqayisədə milli ekspozisiyalarının sahəsini böyüdüblər. AMEA Milli Azərbaycan Tarixi Muzeyi də bu sərgidə iştirak edir və öz milli-mənəvi dəyərlərini təmsil edir. Burada muzeyin Silahlar və bayraqlar, Etnoqrafiya fondlarının kolleksiyasından 58-ə yaxın dəyərli inci nümayiş olunur. Hər gün sərgini ziyarət edənlər muzey pavilyonuna xüsusi maraq göstərib, yaxından tanış olurlar. Bu gün sərgini ziyarət edən K.Kərimov adına 8 saylı məktəbin şagirdləri muzeyin eksponatları – silahlar, dəbilqələr, xalça məmulatları və s. ilə tanış olublar. Milli Azərbaycan Tarixi Muzeyinin Silahlar və bayraqlar fondunun müdiri, t.ü.f.d., dos. S.Vahabova şagirdlərə eksponatlar haqqında ətraflı məlumat verib. Burada ziyarətçilər ölkənin müdafiə sənayesinin yenilikləri, habelə Azərbaycan Respublikası Silahlı Qüvvələrinin mövcud və inkişaf edən potensialı ilə yaxından tanış olmaq imkanı əldə edirlər.