Bu gün H.Z.Tağıyev adına 123 №-li tam orta məktəbin yaradılmasının 124 illik yubileyi qeyd edilib. Tədbirdə Milli Azərbaycan Tarixi Muzeyinin direktoru, akademik Nailə Vəlixanlı və bir qrup əməkdaş iştirak ediblər. Məktəb 1894-cü il sentyabr ayının 27-də Bakının Mərdəkan qəsəbəsində görkəmli xeyriyyəçi Hacı Zeynalabdin Tağıyev tərəfindən tikdirilib başa çatmışdır. Əvvəlcə məktəb imkanı zəif olan şagirdlər üçün iki sinifli bağçılıq məktəbi kimi fəaliyyətə başlamışdır. 1918-ci ildə erməni işğalçılarının Bakıda və onun ətraf kəndlərində törətdikləri vəhşiliklər zamanı məktəb azərbaycanlı döyüşçülərin qərargahına çevrilir. Hazırda məktəb onbirillik orta məktəb kimi fəaliyyət göstərir. Bu əlamətdar gün münasibətilə tarixçi alim N.Vəlixanlı məktəbin rəhbərliyini təbrik edib və onlara gələcək işlərində uğurlar arzulayıb. Nailə xanım H.Z.Tağıyevin həyat və yaradıcılığına nəzər salaraq, tədbir iştirakçılarına onun yaşadığı mülkündə fəaliyyət göstərən xatirə muzeyi haqqında məlumat verib. Tədbirdə Hacı Zeynalabdin Tağıyevin ictimai, maarifçilik, xeyriyyəçilik fəaliyyətindən bəhs edilib və onun əbədi olaraq xalqın yaddaşında yaşayacağı bildirilib. Sonra qonaqlar məktəbdə H.Z.Tağıyevə həsr olunan stendlə tanış olublar. Muzey əməkdaşları məktəb ərazisində yerləşən türk şəhidlərinin məzarını və H.Z.Tağıyevin büstünü ziyarət ediblər. .