İstanbul Əsgəri Muzeyinin sektor müdiri Ömər Faruk Arslan və muzeyin mütəxəssisi Dinçer Karasoy Milli Azərbaycan Tarixi Muzeyini ziyarət etdilər. Qonaqlar muzeyin ekspozisiya zalları ilə yaxından tanış oldu, bələdçi tərəfindən onlara Azərbaycan tarixinə aid muzeydə nümayiş etdirilən maddi mədəniyyət nümunələri haqqında geniş məlumat verildi. Həmçinin H.Z.Tağıyevin xatirə muzeyini də gəzdilər. Qonaqlar muzeydə görkəmli xeyriyyəçi H.Z.Tağıyevin həyatı və fəaliyyətinə dair fotoşəkillər, tarixi sənədlər, ona məxsus qiymətli əşyalarla tanış oldular. Buradakı məişət əşyaları və tarixi sənədlər onlarda zəngin təəssürat yaratdı. Daha sonra türkiyəli qonaqlar muzeyin direktoru, akademik Nailə Vəlixanlı ilə görüşdülər. Qonaqlara Azərbaycanla Türkiyənin iki dövlət, bir millət olduğunu söyləyən akademik N.Vəlixanlı muzeyin tarixi haqqında qonaqlara məlumat verdi. Sovet hakimiyyətinin ilk illərində qeyri-azərbaycanlıların muzeyə rəhbərlik etməsi səbəbindən bir çox eksponatın xarici ölkələrə daşındığını qeyd etdi. Həmçinin muzeyin AMEA strukturunda elmi-tədqiqat və mədəni-maarif müəssisəsi funksiyasını yerinə yetirdiyini bildirdi. Nailə xanım Azərbaycan Prezidenti İlham Əliyevin göstərişi ilə muzeyin əsaslı təmir olunduğunu da nəzərə çatdırdı. Heydər Əliyev Fondunun dəstəyi ilə muzey eksponatlarının xaricdə, o cümlədən Vatikanda sərgiləndiyini qeyd etdi. Türkiyəli qonaqlar ziyarətdən məmnun qaldıqlarını bildirdilər. Əsgəri Muzeyin tarixi haqqında məlumat verib, orada qorunan Şirvanşahlar dövlətinə aid bəzi zirehli hərbi geyimlərin və silahların İçərişəhər Dövlət Tarix-Memarlıq Qoruğunda sərgilənməsi üçün Azərbaycana gətirdiklərini bildirdilər. Qeyd edək ki, 23-24 oktyabr tarixlərində Qoruqda “Müasir Azərbaycandan tarixi Şirvanşahlar dövlətinə səyahət” adlı beynəlxalq konfrans və “Şirvanşahların irsi dünya muzeylərində” adlı sərgi keçiriləcək. Nailə xanım Milli Azərbaycan Tarixi Muzeyi ilə Əsgəri Muzey arasında əlaqələrin daha da inkişafını və hər iki muzey arasında sərgilərin və digər tədbirlərin keçirilməsini də arzu etdi. Gələcək əməkdaşlıq üçün müzakirələr aparıldı. Sonda Ömər Faruk Arslana və Dinçer Karasoya muzeyin nəfis tərtibatlı nəşrləri hədiyyə edildi.