"İçərişəhər" Dövlət Tarix-Memarlıq Qoruğu İdarəsi və AMEA tərəfindən 23-24 oktyabr tarixlərində Bakıda keçirilən "Müasir Azərbaycandan tarixi Şirvanşahlar dövlətinə səyahət" adlı beynəlxalq elmi konfrans çərçivəsində "Şirvanşahlar irsi dünya muzeylərində" sərgisi açılmışdır. Sərginın açılış mərasimində Milli Azərbaycan Tarixi Muzeyinin direktoru, akademik Nailə Vəlixanlı və muzeyin bir qrup əməkdaşı da iştirak etmişdir. Sərgidə muzeyin fondlarında qorunan Şirvanşahlar dövlətinə aid nadir eksponatlar, maddi mədəniyyət nümunələri də təqdim edilir. Bunlara nümunə olaraq, orta əsrlərə aid şirli boşqablar, tunc quş fiquru fraqmenti, yazılı şirli kaşı fraqmenti, qızıl sırğalar, Şirvanşahlara aid numizmatik materiallar – dirhəm və təngələr və s. göstərilə bilər. Həmçinin, İstanbul Hərbi Muzeyindən, Gürcüstan Milli Muzeyindən, Rusiya muzeylərindən gətirilən nadir eksponatlar da nümayiş olunur. Əsasən Azərbaycanın Şirvan bölgəsindən arxeoloji qazıntılar zamanı tapılmış və Şirvanşahlar dövlətinə aid eksponatlar - dəbilqələr, zirehli köynəklər, kaşılar və s. burada xüsusi yer tutur. Sərgi gələn 2019-cu il, 23 yanvar tarixinə qədər İçərişəhərdə, Şirvanşahlar Sarayı Kompleksində hər gün saat 9.00-dan 20.00-dək ziyarətçilər üçün açıq olacaq. Qeyd edək ki, sərginin açılışı ilə əlaqədar rəngarəng mövzularla zəngin "Şirvanşahlar irsi dünya muzeylərində" adlı kataloq nəşr olunub.