Berlində AXİCA konqreslər sarayında Heydər Əliyev Fondunun və Azərbaycanın Almaniyadakı səfirliyinin təşkilatçılığı ilə Azərbaycan Xalq Cümhuriyyətinin yaranmasının 100 illiyinə həsr olunan sərginin açılışı və rəsmi qəbul (07.11.2018), həmçinin Şarlottenburq sarayında “Şərqdə ilk dünyəvi parlament respublikası: dəyərlər və irs” mövzusunda elmi konfransda (06.11.2018) Milli Azərbaycan Tarixi Muzeyinin şöbə müdiri, t.ü.f.d., dosent Səbuhi Əhmədov iştirak etmişdir. Heydər Əliyev Fondunun icraçı direktoru Anar Ələkbərov, Azərbaycanın Almaniyadakı səfiri Ramin Həsənov, Bundestaqın deputatları, Almaniya hökumətinin təmsilçiləri, Almaniyada akkreditə olunmuş diplomatik nümayəndəliklərin rəhbərləri, ictimai-siyasi dairələrin nümayəndələrinin iştirak etdikləri tədbirdə Azərbaycan Xalq Cümhuriyyətinin tarixinə dair sərgi olduqca böyük marağa səbəb olumuşdur. Sərgidə Azərbaycan Xalq Cümhuriyyətinin siyasi, iqtisadi, beynəlxalq münasibətlər, ordu quruculuğu, təhsil, elm və mədəniyyət sahəsində həyata keçirdiyi tədbirləri işıqlandıran stendlər, sənədli filmlər, fotolardan ibarət slaydlar, tarixi eksponatlar nümayiş etdirilmişdir. Sərginin qurulmasında iştirak edən S.Əhmədov sərginin davam etdiyi müddətdə qonaqlara Milli Azərbaycan Tarixi Muzeyinin fondlarından sərgiyə təqdim edilmiş və AXC-yə aid olan tarixi eksponatlar barəsində məlumat vermiş, sualları cavablandırmışdır.