AMEA Milli Azərbaycan Tarixi Muzeyinin Numizmatika Fondunda Gəncə bölgəsində aşkarlanmış 32 ədəd gümüş sikkədən ibarət dəfinənin bir hissəsi mühafizə olunur. Numizmatik təyinat nəticəsində dəfinədə orta çəkisi 2,5 q, diametri 21-22 mm olan əksər gümüş dirhəmlərin Təbriz, Mərənd, Ərzincan, Naxçıvan və s. şəhər-zərbxanalarında zərb edildiyi məlum olmuşdur. Bu dirhəmlər Elxani hökmdarları – Hülakü (1256-1265), Abaqa (1265-1282), Əhməd (1282-1284), Arğun (1284-1291), İrincin Turçi Keyxatu (1291-1295), Ulcaytu (1304-1316), Əbu Səid (1316-1335) adınadır. Dəfinədəki adsız gümüş dirhəmlər isə 200 ildən artıq davam edən “gümüş böhranı”ndan sonra ilk dəfə olaraq paytaxt şəhər-zərbxanalarında (Gəncə, Təbriz, Naxçıvan) zərb edilmişlər.