CBC TV kanalında “Tarixin dərinliyinə səyahət” adlı 3 hissəli veriliş (rus dilində) təqdim edilib. Senari müəllifi və aparıcısı Anastasiya Ponarina olan verilişin II hissəsində Milli Azərbaycan Tarixi Muzeyinin orta əsrlər dövrünü əhatə edən ekspozisiya zalı nümayiş etdirilmiş, eksponatlar haqqında geniş məlumat verilmişdir. Verilişdə X-XVIII əsrlərə aid eksponatlar geniş şəkildə təqdim edilmişdir. Ekspozisiyada nümayiş etdirilən və üzərində İran mifolojik hökmdarlarının rəsmi olan xalça, kufi xətti ilə ərəb dilində yazılmış Bakı qalasının XII əsrə aid daş kitabəsi, Şirvanşahlara və s. orta əsr dövlətlərinə məxsus numizmatik materiallar göstərilib. Mingəçevir yaxınlığında «monqol dövrü» adlandırılan dövrə aid döyüşçü qəbirindən tapılan silahlar, maneken üzərindəki xələt, məişət əşyaları, XIV-XV əsrlərə aid Qaraqoyunlu və Ağqoyunlu dövrünə məxsus, başdaşısı qoç formasında olan abidələr və s. verilişdə işıqlandırılmışdır. Həmçinin, Səfəvilər dövrü, Şah İsmayıl Xətainin zamanında Azərbaycanın vahid dövlətdə birləşdirilməsinə cəhd və ana dilimizin dövlət dilinə çevrilməsi haqqında da ətraflı məlumat verilmiş, bu dövrə aid eksponatlar – silahlar, rəsm əsərləri, numizmatik materiallar təqdim edilmişdir. Həmçinin, Qarabağ atının maketi və orta əsr kənd təsərrüfatı alətləri, saxsı qablar və s. məişət əşyaları da işıqlandırılmışdır. CBC TV kanalının bu verilişi Azərbaycan tamaşaçısına muzeyimizi və orta əsrlər tariximizi tanıtmaq baxımından əhəmiyyətlidir.