CBC TV kanalında “Tarixin dərinliyinə səyahət” adlı 3 hissəli veriliş (rus dilində) təqdim edilmişdir. Senari müəllifi və aparıcısı Anastasiya Ponarina olan verilişdə Milli Azərbaycan Tarixi Muzeyinin ekspozisiya zalları nümayiş etdirilmiş, eksponatlar haqqında geniş məlumat verilmişdir. Verilişin I hissəsində ekspozisiyada nümayiş olunan ibtidai icma dövrü, daş dövrü, mis-daş dövrü, tunc və erkən dəmir dövrü materialları təqdim edilmişdir. Ekspozisiyada göstərilən daşlaşmış ağac ve heyvan sümüklərinin qalıqları, Azıx mağarasından tapılmış əmək alətləri, ovlanmış heyvan sümükləri, 400 min il əvvəl yaşamış Azıx insanının çənə sümüyünün mulyajı və s. verilişdə işıqlandırılmışdır. Həmçinin, zaldakı qədim qəbir nümunələri, antik döyüşçülər və silahları, qədim bəzək və dini ayin əşyaları, balbal adlanan daş heykəllər və s. haqqında da ətraflı məlumat verilmişdir. CBC TV kanalının bu verilişi Azərbaycan tamaşaçısına muzeyimizi və qədim tariximizi tanıtmaq baxımından mühüm əhəmiyyətə malikdir.