Milli Azərbaycan Tarixi Muzeyinin Etnoqrafiya fondunda Naxçıvan MR-nın maddi mədəniyyətinə məxsus əşyalar mühafizə olunur və mütəmadi olaraq kolleksiyaya yeniləri də daxil olmaqdadır. Yeni daxil olmuş belə nümunələrdən biri də - Naxçıvan qadınlarının geydiyi arxalıq və tumandır. XX əsrin əvvəlinə aid edilən bu geyimlərin üzü zərqazı materialından, astarı ağımtıl satindəndir. Boyvəboy biçilmiş uzun və düz qolları olan arxalığın və qatlamalı tumanın kənarlarına zəncirə adlı bafta tikilmişdir. Geyim, XX əsrin əvvəllərinə qədər Naxçıvanda mövcud olan geyim mədəniyyətini və eləcə də qədim parça nümunələrini öyrənmək üçün əvəzsiz nümunədir.