İstanbuldakı Hərbi Muzeyin əməkdaşı, arxeoloq Erkan Sönmez və Topqapı Sarayı Muzeyinin əməkdaşı, incəsənət tarixçisi Elif Canan Karakoç Milli Azərbaycan Tarixi Muzeyini ziyarət ediblər. Qonaqlarıı muzeyin Ekspozisiyanın təhlükəsizliyi üzrə direktor müavini t.ü.f.d., dos.Həbibə Əliyeva qarşıladı. Qonaqlar muzeyin ekspozisiya zalları ilə yaxından tanış olub, bələdçi tərəfindən onlara Azərbaycan tarixinə aid muzeydə nümayiş etdirilən maddi mədəniyyət nümunələri haqqında geniş məlumat verilib. Həmçinin, H.Z.Tağıyevin xatirə muzeyini də gəziblər. Qonaqlar muzeydə görkəmli xeyriyyəçi H.Z.Tağıyevin həyatı və fəaliyyətinə dair fotoşəkillər, tarixi sənədlər, ona məxsus qiymətli əşyalarla tanış olublar. Buradakı məişət əşyaları və tarixi sənədlər onlarda zəngin təəssürat yaradıb. Türkiyəli qonaqlar ziyarətdən məmnun qaldıqlarını bildiriblər. Öz muzeylərinin tarixi haqqında məlumat veriblər. Orada qorunan Şirvanşahlar dövlətinə aid eksponatlardan bəhs ediblər. Bu eksponatların Şirvanşahlar Sarayı Kompleksində keçirilən “Şirvanşahların irsi dünya muzeylərində” adlı sərgidə nümayiş etdirildiyini qeyd ediblər. Milli Azərbaycan Tarixi Muzeyi ilə öz muzeyləri arasında əlaqələrin daha da inkişafını və sərgilərin, digər tədbirlərin keçirilməsini də arzu ediblər. Sonda Erkan Sönmezə və Elif Canan Karakoça muzeyin nəfis tərtibatlı nəşrləri hədiyyə edilib.