Bu gün görkəmli şərqşünas-tarixçi alim, akademik Nailə Məmmədəli qızı Vəlixanlının doğum günüdür. Nailə Vəlixanlı 1940-cı il dekabrın 25-də Bakı şəhərində Azərbaycanın tanınmış mədəniyyət xadimi, xalq artisti Məmmədəli Vəlixanlının ailəsində anadan olmuşdur. 1948-1958-ci illərdə Bakı şəhəri 132 saylı orta məktəbdə, 1958-1963-cü illərdə Azərbaycan Dövlət Universitetinin (BDU) şərqşünaslıq fakültəsinin ərəb şöbəsində oxumuşdur. 1963-cü ildə ali təhsilini fərqlənmə diplomu ilə başa vurub təyinatla Azərbaycan EA-nın Şərqşünaslıq İnstitutunun Ərəb ölkələri tarixi şöbəsində baş laborant vəzifəsində əmək fəaliyyətinə başlamışdır. 1964-1967-ci illərdə görkəmli şərqşünas Ziya Bünyadovun rəhbərliyi ilə “IX-XII əsr ərəb coğrafiyaşünas-səyyahları Azərbaycan haqqında” mövzusunda namizədlik dissertasiyası üzərində işləmişdir. 1970-2005-ci illərdə pedaqoji fəaliyyətlə məşğul olmuş, Azərbaycan (Bakı) Dövlət Universitetində, Azərbaycan Dövlət Pedaqoji İnstitutunda, Xəzər, Ziya, Azərbaycan Universitetlərində “Ərəb ölkələri tarixi”, “İslam tarixi”, “Ümumi tarix”, “Azərbaycan tarixi”, “Asiya və Afrika ölkələri tarixi”, “Dünya dinləri”, “Azərbaycan tarixinin mənbəşünaslığı və tarixşünaslığı” və digər fənləri tədris etmişdir. 2007-ci il aprel ayında Azərbaycan Milli Elmlər Akademiyasının həqiqi üzvü və vitse-prezidenti seçilmişdir. 1998-ci ilin iyul ayından indiyədək AMEA Milli Azərbaycan Tarixi Muzeyinin direktorudur. 2018-ci ilin noyabr ayının 25-də İpəkyolu Beynəlxalq Muzeylər Alyansının (İBMA) vitse-prezidenti seçilmişdir. 2010-cu ildə “Şöhrət” ordeni ilə təltif olunmuş, 2015-ci ildə Əməkdar elmi xadimi adını almışdır. 2018-ci il may ayının 18-də İCOM Azərbaycan Milli Komitəsi tərəfindən Akademik Nailə Vəlixanlı komitənin fəaliyyətində göstərdiyi xidmətlərə görə “Fəxri üzv” nominasiyası üzrə diplomla təltif olunub. AMEA Rəyasət Heyətinin 2018-ci il aprelin 5-də keçirilmiş iclasında 6 alimin adlı mükafatlarla təltif olunması haqqında qərar qəbul edilmişdir. 2018-ci il noyabr ayının 25-də Azərbaycanın və Yaxın Şərqin erkən orta əsrlər tarixinin mənbəşünaslıq, regionun sosial-iqtisadi, siyasi-mədəni problemlərinin və tarixi coğrafiyasının tədqiqi, təhlili və təbliğinə görə akademik Nailə Vəlixanlı AMEA-nın Abbasqulu ağa Bakıxanov adına mükafatına layiq görülüb. Görkəmli alim Azərbaycanın orta əsrlər tarixini işıqlandıran bir sıra qiymətli monoqrafiyaların, elmi əsərlərin də müəllifidir. Akademik Nailə Vəlixanlını Muzey kollektivi adından bir daha təbrik edir, uzun ömür, sağlamlıq və xoşbəxtlik arzu edirik!